Վրաստանում մեկնարկել են Անակլիայի խորջրյա նավահանգստի՝ Միջին միջանցքի առանցքային հանգույցի, ստեղծման աշխատանքները

Վրաստանում սկսվել է Անակլիայի խորջրյա նավահանգստի շինարարության առանցքային փուլերից մեկը, որն իշխանությունները դիտարկում են որպես ապագա տարածաշրջանային լոգիստիկ հաբ և Ասիան ու Եվրոպան Ռուսաստանի շրջանցմամբ կապող Միջին միջանցքի կարևոր օղակ, հայտնում է Грузия Online-ը։

Ինչպես հայտնել են երկրի Էկոնոմիկայի նախարարությունում, նավահանգստի ակվատորիա է ժամանել բելգիական Jan De Nul ընկերության մասնագիտացված նավը, որը կսկսի հատակախորացման աշխատանքները և մոտեցման ջրանցքի ստեղծումը՝ խոշորատոննաժ կոնտեյներանավեր ընդունելու համար։

Աշխատանքների ընթացքում ծովի հատակի խորությունը կհասցվի մինչև 17,5 մետրի։ Հաջորդ փուլը կլինի 1380 մետր երկարությամբ ալեբախի շինարարությունը։ Գերատեսչության տվյալներով, ծրագրի իրականացումն ընթանում է ըստ ժամանակացույցի, իսկ հատակախորացման աշխատանքները նախատեսվում է ավարտել մինչև 2027 թվականի մայիսը։

Ծովային ենթակառուցվածքը կառուցում է բելգիական Jan De Nul ընկերությունը, որը պայմանագիրը ստացել էր 2024 թվականին, վրացի գործընկերների հետ համատեղ։ Պետությունն իր հերթին զբաղվում է ապագա նավահանգստի ավտոմոբիլային և երկաթուղային մոտեցնող ճանապարհների շինարարությամբ։

Ծրագրի առաջին փուլը իշխանությունները ծրագրում են ավարտել մինչև 2029 թվականը։ Շահագործման հանձնելուց հետո նավահանգիստը տարեկան կկարողանա սպասարկել մինչև 600 հազար կոնտեյներ, իսկ առաջին փուլում ներդրումների ծավալը գնահատվում է մոտ 600 միլիոն դոլար։

Անակլիայի շինարարությունը, որը Վրաստանում անվանում են «դարի նախագիծ», բազմիցս հետաձգվել է։ 2020 թվականին կառավարությունը լուծարեց պայմանագիրը վրաց-ամերիկյան կոնսորցիումի հետ, ինչից հետո նախագիծը փաստացի սառեցվեց։ Սակայն միջազգային առևտրի համար Միջին միջանցքի աճող նշանակությունը նոր ազդակ հաղորդեց դրան։

Հուլիսին վրացական իշխանությունները հայտարարեցին, որ նավահանգիստը զարգանալու է «լենդլորդ» (landlord) մոդելով. պետությունը կպահպանի վերահսկողությունը հողի և հիմնական ենթակառուցվածքների նկատմամբ, իսկ առանձին տերմինալների կառավարումը կհանձնվի մասնավոր և միջազգային օպերատորներին։ Էկոնոմիկայի նախարար Մարիամ Քվրիվիշվիլին նշել է, որ նման մոտեցումը թույլ կտա դիվերսիֆիկացնել բեռնահոսքերը և արագացնել Անակլիա նավահանգստի ինտեգրումը միջազգային տրանսպորտային ցանցին։