«ՀԺ». Լևոն Տեր-Պետրոսյանը այցելել է Ստեփան Դեմիրճյանին

Երեկ Լևոն Տեր-Պետրոսյանը այցելել է ՀԺԿ նախագահ Ստեփան Դեմիրճյանի տուն, հյուրընկալվել պատգամավորին: Հանդիպումը տևել է մոտ քառասունհինգ րոպե:

«Հայկական ժամանակը» գրում է, որ առաջին նախագահի այս մասնավոր այցը կապված է ՀԺԿ առաջնորդի՝ վերջերս ունեցած առողջական խնդիրներով: Լևոն Տեր-Պետրոսյանը, ըստ ամենայնի, այցելել է Ստեփան Դեմիրճյանի առողջությամբ հետաքրքրվելու համար: Այս այցը կարևոր է նաև Հայ ազգային կոնգրեսում վերջին շրջանում տեղի ունեցող խմորումների համատեքստում: Վերջին շրջանում հաճախակի էին դարձել խոսակցությունները, որ Ստեփան Դեմիրճյանի ղեկավարած կուսակցությունը՝ ՀԺԿ-ն, նույնպես պատրաստվում է լքել ՀԱԿ-ը: Անցյալ շաբաթվա վերջին Դեմիրճյանը «ՀԺ»-ին տված հարցազրույցում հերքեց այդ լուրերը, ասելով, որ ՀԺԿ-ն եղել և մնում է ՀԱԿ-ի առանցքային կուսակցություններից մեկը:

ՀԱԿ-ը պատրաստվում է մարտի 1-ին հանրահավաք և երթ անցկացնել՝ ի հիշատակ 2008 թվականի «Մարտի 1»-ի սպանդի ժամանակ զոհվածների: ՀՀՇ վարչության անդամ Վահագն Հայոցյանը հայտարարել է, որ իրենք արդեն դիմել են Երևանի քաղաքապետարան՝ միջոցառման մասին իրազեկելու, ինչպես նաև ասել է, որ այդ հանրահավաքին մասնակցելու է նաև ՀՀ առաջին նախագահ Լևոն Տեր-Պետրոսյանը:

Դա լինելու է զուտ հիշատակի հանրահավաք՝ մարտի մեկի զոհերին հարգանքի տուրք մատուցելու նպատակով, թե՝ նաև հնչելու են քաղաքական ելույթներ, «Հայ ազգային կոնգրեսում», ինչպես երեկ հայտնել են «ՀԺ» թղթակցին, դեռ չեն որոշել:

Իսկ ահա վերջին տարիներին Կոնգրեսի շարքերը լքած տարբեր քաղաքական ուժերի ներկայացուցիչներ և առանձին անհատներ խուսափել են ուղիղ պատասխանել «ՀԺ» թղթակցի հարցին, թե արդյոք իրենք մի կողմ կդնեն տարաձայնությունները և կմասնակցեն Մարտի 1-ի հանրահավաքին: Միայն ՀՈԻՊ նախագահ Գառնիկ Մարգարյանն է ասել, որ եթե խոսքը գնում է Մարտի 1-ի զոհերի հիշատակին կազմակերպվող հանրահավաքին, ապա իրենք, անշուշտ, կմասնակցեն դրան: