«Պայքարը շարունակվում է». Գառնիկ Դանիելյանն ամփոփել է պատգամավորական գործունեությունը

Նախկին պատգամավոր Գառնիկ Դանիելյանը ֆեյսբուքյան իր էջում ամփոփել է Ազգային ժողովի 8-րդ գումարման ընթացքում իրականացրած գործունեությունն ու հայտարարել, որ շարունակելու է իր պայքարը նաև պատգամավորական լիազորությունների ավարտից հետո։

Դանիելյանի խոսքով՝ 2022 թվականի հոկտեմբերից, երբ ստանձնել էր պատգամավորի մանդատը, փորձել է իր լիազորությունների շրջանակում նպաստել ավելի անվտանգ և արժանապատիվ պետության կառուցմանը։

Նա նշել է, որ այս տարիներին զբաղվել է անվտանգության, Արցախի, սահմանամերձ համայնքների, տնտեսության, գյուղատնտեսության, մարդու իրավունքների, կրթության, մշակույթի և շրջակա միջավայրի խնդիրներով։ Դանիելյանի փոխանցմամբ՝ պետական տարբեր գերատեսչությունների է ուղարկել շուրջ 2000 գրություն, իսկ Արցախից բռնի տեղահանվածների հարցերով զբաղվել է շուրջ 1500 քաղաքացու խնդիրներով։

«Շնորհակալություն եմ ուզում հայտնել մեր հազարավոր աջակիցներին՝ այս տարիների աննահանջ պայքարի, փոխվստահության և արդյունավետ համագործակցության համար։ (…) Անկախ կարգավիճակից՝ փորձելու եմ իմ հնարավորությունների սահմաններում աջակցել մեր քաղաքացիներին։ (…) Պայքարը շարունակվում է։ Ոչ ոք դրանից ետ չի կանգնելու, ես՝ նույնպես»,- գրել է Դանիելյանը։

Նա նաև հաջողություն է մաղթել Ազգային ժողովի 9-րդ գումարման պատգամավորներին՝ նշելով, որ շարունակելու է ակտիվորեն ներգրավված մնալ հանրային կյանքում։