ՀԷՑ-ի տնօրենների խորհուրդը մեկ տարում ստացել է 260 մլն դրամ․ Ռոմանոս Պետրոսյան

Հայաստանի էլեկտրական ցանցերի (ՀԷՑ) ժամանակավոր կառավարիչ Ռոմանոս Պետրոսյանը հայտարարել է, որ ընկերության տնօրենների խորհուրդը վերջին 12 ամիսների ընթացքում ստացել է շուրջ 260 մլն դրամ աշխատավարձային վճարումներ, սակայն չի մասնակցել ընկերության կառավարման գործընթացներին։

Պետրոսյանն այս մասին գրել է ֆեյսբուքյան իր էջում՝ նշելով, որ ՀԷՑ-ի տնօրենների խորհրդի 5 վարձատրվող անդամները միասին ստացել են շուրջ 176 մլն դրամ, իսկ մոտ 84 մլն դրամ հատկացվել է խորհրդի աշխատակազմին՝ խորհրդականներ, օգնականներ, վարորդներ և այլ աշխատակիցներ։

Նրա խոսքով՝ այդ ժամանակահատվածում տնօրենների խորհուրդը չի աջակցել ընկերության ճգնաժամային կառավարմանը, չի մասնակցել խնդիրների լուծմանը և չի իրականացրել ռազմավարական նշանակության որոշումների կայացման աշխատանքներ։

«Ավելի քան մեկ տարի է՝ ՀԷՑ-ի տնօրենների խորհուրդը մատնված է առերևույթ անգործության, սակայն խորհրդի մի շարք անդամներ շարունակում են վարձատրվել ՀԷՑ-ի ֆինանսական միջոցներից»,- գրել է Պետրոսյանը։

Նա առաջարկել է տնօրենների խորհրդի՝ ՀԷՑ-ի բյուջեից աշխատավարձ ստացող անդամներին հետևել խորհրդի նախկին նախագահ, ԱԺ պատգամավոր Նարեկ Կարապետյանի օրինակին և կամավոր հրաժարվել իրենց աշխատավարձերից՝ մինչև ընկերության իրավակազմակերպական ձևի փոփոխությունը։

Պետրոսյանը նաև նշել է, որ խորհրդի անդամների աշխատավարձերի սահմանումն ու փոփոխությունը դուրս է ժամանակավոր կառավարչի լիազորություններից և գտնվում է բաժնետերերի ընդհանուր ժողովի իրավասության ներքո։