Լեմկինի ինստիտուտն աջակցում է Ռուբեն Վարդանյանի կնոջ նախաձեռնությանը

Լեմկինի անվան ցեղասպանության ինստիտուտը հայտարարել է, որ լիովին աջակցում է Ռուբեն Վարդանյանի կնոջ՝ Վերոնիկա Զոնաբենդի նախաձեռնությանը՝ միջազգային կանանց մարդասիրական պատվիրակություն կազմակերպելու Բաքու՝ այնտեղ պահվող հայ պատանդներին, այդ թվում՝ իր ամուսնուն այցելելու նպատակով։

Հայտարարության մեջ նշվում է, որ Լեռնային Ղարաբաղի Հանրապետության նախկին պետական նախարար Ռուբեն Վարդանյանը 2023 թվականից պահվում է Բաքվում՝ Արցախի նախկին պաշտոնյաների և հայ ռազմագերիների հետ միասին։ Ինստիտուտի գնահատմամբ՝ նրանց նկատմամբ առաջադրված մեղադրանքները կեղծ են, իսկ դատավարությունները չեն համապատասխանում միջազգային և մարդու իրավունքների չափանիշներին։

Լեմկինի ինստիտուտը նշում է, որ Բաքվում պահվող հայ պատանդները գտնվում են ծանր պայմաններում, իսկ Կարմիր Խաչի միջազգային կոմիտեի Բաքվի գրասենյակի փակումը նրանց զրկել է միջազգային մարդասիրական աջակցության հնարավորությունից։

Վերոնիկա Զոնաբենդի նախաձեռնած առաքելության նպատակն է հնարավորություն ստանալ հանդիպելու հայ գերիներին։ Ինստիտուտը հիշեցնում է, որ Զոնաբենդն ու Ռուբեն Վարդանյանը երկար տարիներ ներգրավված են եղել միջազգային մարդասիրական ծրագրերում, այդ թվում՝ «Ավրորա» մարդասիրական նախաձեռնությունում։

Լեմկինի ինստիտուտը կոչ է արել ԱՄՆ-ի, Կանադայի, Մեծ Բրիտանիայի և ԵՄ անդամ պետությունների կառավարություններին աջակցել այս մարդասիրական առաքելությանը՝ ապահովելով Բաքու մեկնող պատվիրակության անվտանգությունը։ Միաժամանակ ինստիտուտը դիմում է մարդու իրավունքների պաշտպաններին, միջազգային կազմակերպություններին և քաղաքական գործիչներին՝ միանալու նախաձեռնությանը և նպաստելու Բաքվում պահվող հայ պատանդների ընտանիքների՝ իրենց հարազատներին այցելելու իրավունքի իրացմանը։