Դուք ուսանող ժամանակ շատ կրակոտ երիտասարդ էիք. Սերժ Սարգսյանի համակուրսեցին՝ Սարգսյանին

Սերժ Սարգսյանի Մալաթիա-Սեբաստիա համայնքում դեռ անցյալ շաբաթ նախատեսված հանդիպումը, որ հետաձգվել էր Պարույր
Հայրիկյանի մահափորձից հետո, երեկ տեղի ունեցավ: «Հայկական ժամանակը» գրում է, որ Սարգսյանը իր ելույթը սկսեց մյուս թեկնածուների հասցեին գովեստի խոսքեր շռայլելով: 

«Բնական է, որ ընտրացուցակներում լինելու են միայն թեկնածուների անուն, ազգանունները, վստահ եմ, որ չեք կասկածում, որ բոլորն էլ հայրենասեր, սեփական երկրի ապագայով մտահոգ ու Հայաստանի զարգացման սեփական տեսլականն ունեցող մարդիկ են: Մեր հասարակության մի հատվածը, իհարկե, ընտրելու է Պարույր Հայրիկյանին, մարդ, որ իր ողջ կյանքով ու ճակատագրով մարմնավորում է անկախ Հայաստանի միշտ վառ գաղափարը: Հասարաակության մեկ այլ հատված կընտրի Հրանտ Բագրատյանին, մարդ, որ ունի երկրի զարգացման սեփական տեսլականը: Հասարակության մի հատվածն էլ կընտրի Րաֆֆի Հովհաննիսյանին, մարդ, ով դարձել է անընդունելի երևույթների դեմ պայքարող հայրենասերի խորհրդանիշ: Մնացածների մասին էլ կարող եմ դրական բաներ ասել, բայց ես եկել եմ ձեզ ներկայացնելու, թե ինչու պետք է հասարակության մի հատվածն էլ ինձ ընտրի»: Անսպասելի այս նախաբանից հետո Սարգսյանը հայտարարեց, թե ապահով Հայաստանը սոսկ գեղեցիկ ծրագիր չէ, այն զարգացում և բարեկեցություն է բերելու մեր երկրին: Մալաթիայի Հայորդյաց տանը հավաքվածների առջև նա ելույթ ունեցավ արտաքին քաղաքականության թեմայով, ապա առաջարկեց անցնել երկխոսության: Երբ խոսքը հասավ աշխատատեղերին, հայտարարեց, թե այդ հարցը ՀՀ-ում այլևս խնդիր չէ, որովհետև ցանկացած հեռուստաալիք միացնում ես, աշխատողներ են փնտրում: «Բայց ցավոք սրտի, այդ աշխատանքը քիչ վճարվող աշխատավարձով աշխատանք է, և այլևս 150 հազար դրամով որևէ մեկը չի ուզում գնալ և աշխատել»,- Սարգսյանի այս հայտարարությունից հետո դահլիճում զարմանքի ալիք բարձրացավ: Բզզոցը լսելով, նա դիմեց առաջին շարքում նստած Երևանի քաղաքապետ Տարոն Մարգարյանին.

«Տարոն, խնդրեմ, ասա, թե քանի վարորդի կարիք ունենք»: Տարոնն անմիջապես տեղից վեր կացավ և ասաց. «150 աշխատատեղ՝ վարորդի, մոտ 250 աշխատատեղ՝ սոցիալ ծառայությունում»: Դահլիճից հարցրեցին՝ տարիքային սահմանափակում չկա՞: «Տարիքային սահմանափակումը ո՞րն է վարորդի համար: Դե, 90 տարեկան վարորդը վտանգ է ներկայացնում երևի հանրությանը: Միգուցե դուք ակնարկում եք, որ տարբեր տեղերում վաճառողուհի, քարտուղարուհի ընդունելուց միշտ, այո, ուզում են երիտասարդ կանանց, աղջիկներին ընդունել աշխատանքի, որովհետև նրանք լավ են աշխատում երևի»,- ասաց Սարգսյանը:

Երբ արդեն հարցեր չկային, խոսափողին մոտեցավ հերթական ճոխ սանրվածքով կինը, ով պարզվեց, Սերժ Սարգսյանի համակուրսեցին է եղել: «Մեծարգո նախագահ, մենք ծանոթ ենք նախընտրական ծրագրին և ասում ենք՝ այո, մենք վստահ ենք, որ հայրենասեր և պատերազմի բովով անցած մարդը մեր ժողովրդին կտանի դեպի լուսավոր, ապահով Հայաստան, ուղղակի հասարակությունը պետք է կարողանա նաև զորավիգ լինել, որպեսզի կարողանանք այդ ապահով Հայաստանը տեսնենք»,- ասաց տիկինը, ով առաջարկում էր, որ մանկավարժական համալսարանում շախմատի և ռազմագիտության ֆակուլտետներ բացվեն: «Շնորհակալ եմ, տիկին Ռուզաննա, Ռուզաննայի հետ մենք համակուրսեցիներ ենք եղել, դրա համար ինձ գովում է»,- ասաց Սարգսյանը: Տիկին Ռուզաննան կրկին խոսեց.

«Ներեղություն եմ խնդրում, ուղղակի չեմ կարող չասել, նախագահ լինելու, այդ պաշտոնի համար հատուկ որակներ կան, որ մարդը պետք է լինի առաջնորդ և հայրենասեր, ես կարծում եմ, դուք այնքան հանդուրժող և հայրենասեր մարդ եք, որ մենք սիրում և վստահում ենք ձեզ»:

Սերժ Սարգսյանն արձագանքեց. «Շնորհակալ եմ, բայց ուսանող ժամանակ էլ ե՞մ հանդուրժող եղել, ճիշտն ասա»:

«Դուք ուսանող ժամանակ շատ կրակոտ երիտասարդ էիք»,- պատասխանեց տիկին Ռուզաննան: «Լավ, լավ, լավ»,- ասաց Սարգսյանը: Դահլիճը ծիծաղում էր: Սարգսյանի համակուրսեցին, ով պարզվեց, Մոնթե Մելքոնյանի անվան դպրոցի տնօրենն է, լրագրողների հետ զրույցում շարունակեց ձոներ ձոնել Ս. Սարգսյանին:

- Այն ժամանակ մտածո՞ւմ էիք, որ կարող է նախագահ դառնալ:

- Երբեք չենք մտածել:

- Իսկ ո՞նց ձեզ հիշեց:

- Ինքը չգիտեմ, մեր կուրսում երևի բոլորին էր հիշում, և չեմ կարծում, որ մոռանանք, մենք այս տարիքում դժվար թե մարդկանց կարողանանք մոռանալ:

- Սիրած աղջիկ ունե՞ր:

- Եկեք չանդրադառնանք հա՞ դրան: