ՌԴ ԱԳՆ-ն արձագանքել է Ռուսաստանի և Վրաստանի միջև դիվանագիտական հարաբերությունների վերականգնման մասին հայտարարություններին

Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Վրաստանի նախկին նախագահ Միխեիլ Սաակաշվիլիի խոսքերը Մոսկվայի և Թբիլիսիի միջև դիվանագիտական հարաբերությունների հնարավոր վերականգնման վերաբերյալ չպետք է լուրջ ընդունել։ Այս մասին ճեպազրույցի ժամանակ հայտարարել է Զախարովան, գրում է Lenta.ru-ն։

Ավելի վաղ Սաակաշվիլին պնդել էր, որ Վրաստանի իշխանությունները պատրաստվում են վերականգնել Ռուսաստանի հետ դիվանագիտական հարաբերությունները։ Նրա գնահատմամբ՝ երկու երկրների միջև մերձեցումը կարող է հանգեցնել, իր ձևակերպմամբ, «հակաարևմտյան դաշինքի» ձևավորմանը։

Ռուսաստանն ու Վրաստանը դիվանագիտական հարաբերություններ չունեն 2008 թվականից։ Զախարովայի հայտարարությունից, սակայն, չի հետևում, որ Մոսկվան պաշտոնապես հաստատել է հարաբերությունների վերականգնման շուրջ բանակցությունների առկայությունը։