Guardian-ն անդրադարձել է ՀՀ նախագահական ընտրություններին

Անգլիական Guardian պարբերականն անդրադարձել է Հայաստանում փետրվարի 18-ին սպասվող նախագահական ընտրություններին, որտեղ բոլոր հնարավորությունները ունի հաղթելու գործող նախագահ Սերժ Ազատի Սարգսյանը:

Հայաստանն արդեն 20 տարի է` երազում է խաղաղ զարգացումներ, սակայն այն կապված է մի շարք հանգամանքներից, հատկապես՝ կապված Լեռնային Ղարաբաղի հակամարտության հետ: Բոլոր հաշվարկներով՝ փետրվարի 18-ին սպասվող ընտրություններում կարող է հաղթանակ տանել Սերժ Ազատի Սարգսյանը:

Հետխորհրդային հանրապետությունում գործող նախագահը մի քանի առավելություն է վայելում. նա վերահսկում է պետական ապարատը թե՛ ազգային, թե՛ տեղական մակարդակներում, ինչը հնարավորություն է տալիս նրանց մոբիլիզացնել ընտրողներին: Այս ընտրությունների ժամանակ շատ նշանակալից քաղաքական մրցակիցներ չդրեցին իրենց թեկնածությունը, որով ավելի հեշտացրին Սարգսյանի հաղթանակը: Այսպես, դեկտեմբերին «Ազգային կոնգրեսի» ղեկավար Լևոն Տեր-Պետրոսյանը հայտարարեց, որ չի կարող մասնակցել ընտրություններին, ամենայն հավանականությամբ, տարիքի հետ կապված: 2008 թվականի նախագահական ընտրություններում Տեր-Պետրոսյանը պարտություն կրեց, որից հետո սկսվեցին բախումներ, սպանվեց 10 ցուցարար: Իշխանությունը մեղադրում էր վերջինիս ուժով իշխանությունը գրավելու փորձի մեջ: 

Ընտրություններում ոչ մեկ չի ներկայացնելու նաև «Բարգավաճ Հայաստան» կուսակցությունը, չնայած որ մայիսին տեղի ունեցած ընտրությունների ժամանակ այն երկրորդ կուսակցությունն էր ՀՀԿ-ից հետո: Որոշ թեկնածուներ, այնուամենայնիվ, կփորձեն մրցակցել, մասնավորապես՝ Րաֆֆի Հովհաննիսյանը՝ անկախությունից հետո առաջին ԱԳ նախարարը: 

Հովհաննիսյանը հունվարի 17-ին բանակցություններ է ունեցել Ֆրանսիայի նախագահ Ֆրանսուա Օլանդի քաղաքական խորհրդատուներից մեկի՝ Փոլ Ժան Օրթիսի հետ, և Րաֆֆի Հովհաննիսյանը նշել է, որ մարդիկ թերահավատ են դարձել նախկին ընտրությունների կեղծումների պատճառով: 

Ամերիկայում ծնված քաղաքական թեկնածուն նշել է, որ ինքը հաղթանակի հնարավորություն ունի, եթե ընտրությունները թևակոխեն 2-րդ փուլ: Նա պահանջել է քաղաքական դեբատներ, ինչպես նաև դատապարտել է կառավարության կողմից կառավարական ռեսուրսների` հանրային կառույցների, քաղաքապետարանների, դպրոցների, հիվանդանոցների օգտագործումը:

Հովհաննիսյանը հանդիպման ժամանակ նշել է, որ կողմնակիցները շրջաններում ահաբեկման տակ են գտնվում: Նշվում է, որ բացի տնտեսական խնդիրներից՝ թեկնածուների ուշադրության կենտրոնում գտնվում է ԼՂՀ հակամարտության լուծումը և դիվանագիտական հարաբերությունների կարգավորումը Թուրքիայի հետ: 

ԼՂՀ հարցի շուրջ անգլիական պարբերականը մեջբերում է Հովհաննիսյանի խոսքերը. «Կոսովոն, Աբխազիան ու Հարավային Օսիան ճանաչած ցանկացած երկրի համար կեղծավորություն կլիներ չճանաչել Լեռնային Ղարաբաղը»: