Մեր պարտքն է այս մարտահրավերները հաղթահարելը և օգոստոսի 23-ին տեր կանգնելը. Անդրանիկ Թևանյան

Օգոստոսի 23-ը առանձնահատուկ օր է ինձ համար՝ եռակի տոն՝ Եռատոն։
Օգոստոսի 23-ը ՀՀ Անկախության հռչակագրի ընդունման օրն է՝ Հայաստանի ծննդյան վկայականի օրը։

Օգոստոսի 23-ը «Մայր Հայաստան» շարժման հիմնադրման օրն է։
Օգոստոսի 23-ը որդուս՝ Նորայրի ծննդյան օրն է։

Այնպես է ստացվել, որ օգոստոսի 23-ը ինձանից՝ որպես հայր, որպես քաղաքական գործիչ և որպես ՀՀ քաղաքացի, խլել են, խլում են և ուզում են խլել։

Որդուս 15-ամյակը նշում եմ կալանավայրում։ Օգոստոսի 23-ը կիրակի է։ Թեև դատարանն ինձ արդեն թույլատրել է զանգեր անել, բայց, միևնույն է, չեմ կարող որդուս հենց իր ծննդյան օրը զանգել ու շնորհավորել, քանի որ կալանավայրում կիրակի օրերը զանգելու հնարավորություն չկա։ Մնում է հեռակա և գրավոր տարբերակով շնորհավորելը։

Գիտեմ, որ Նորայրս շատ ծանր է տանում կալանքս։ Այն տեղի ունեցավ տղայիս վերջին զանգի օրը, և ես չկարողացա մասնակցել ավարտական այդ միջոցառմանը, թեև խոստացել էի, որ, չնայած քարոզարշավային զբաղվածությանը, անպայման գալու եմ։

Ավելի ուշ իմացա, որ որդիս ինքն էլ այս ամենի պատճառով չմասնակցեց իր վերջին զանգի օրվա միջոցառմանը։

Ես գիտեմ, որ Նորայրս մեծ կամք ունի, ուժեղ է, և համոզված եմ, որ տղամարդավարի կտանի այս ամենը։

Իմ դեմ կարված շինծու գործով և ապօրինի կալանքով ոչ միայն քվեագողություն իրականացրեցին մինչև հունիսի 7-ը, այլ նաև խնդիր էին դրել հարվածել ՔՊ-ի հիմնական գաղափարական ընդդիմախոս «Մայր Հայաստանին»։

Այս տարվա օգոստոսի 23-ը խլված է ինձանից, մեր թիմից, բայց ես ու միլիոնավոր այլ հայեր ավելի մեծ թալանի հեռանկարի առաջ ենք կանգնած։ Մեզանից շատ մեծ բան են ուզում խլել։

Խնդիրն այն է, որ քաղաքացի Նիկոլ Փ.-ն Ալիևի պահանջով և Էրդողանի միջնորդությամբ պատրաստվում է ՀՀ Անկախության հռչակագրից հրաժարվել և ընդունել ադրբեջանահաճո Սահմանադրություն։ Դա նշանակում է, որ նա ՀՀ քաղաքացիներին և բովանդակ հայ ժողովրդին ուզում է զրկել օգոստոսի 23-ը տոնելու հնարավորությունից։

Հազարավոր մահեր բերած այս իշխանությունը ծնունդներ է խլում թե՛ անհատական, թե՛ քաղաքական, թե՛ համահայկական մակարդակներում։

Մեր պարտքն է այս մարտահրավերները հաղթահարելը և օգոստոսի 23-ին տեր կանգնելը։

Աստված պահապան բոլորիս զավակներին։
Աստված պահապան Հայաստանի Հանրապետությանը։
Կեցցե՛ օգոստոսի 23-ը։

Անդրանիկ ԹԵՎԱՆՅԱՆ
«Երևան-Կենտրոն» ՔԿՀ