Վենետիկի 55-րդ բիենալեին Հայաստանը կներկայանա «Տղա Դավթի և աղջիկ Խանդութի հեքիաթը» նախագծով

Հայաստանի Հանրապետության մշակույթի նախարարությունը պաշտոնապես հաստատում է, որ Վենետիկի համաշխարհային 55-րդ բիենալեին Հայաստանը կներկայացնի Արարատ Սարգսյանի «Տղա Դավթի և աղջիկ Խանդութի հեքիաթը» նախագիծը: Որոշման համար հիմք է ծառայել հունվարի 30-ին տեղի ունեցած փորձագիտական հանձնաժողովի նիստի եզրակացությունը:

Ինչպես տեղեկացանք ՀՀ մշակույթի նախարարության հասարակայնության հետ կապերի բաժնից, փորձագիտական հանձնաժողովը միաձայն հավանության է արժանացրել Արարատ Սարգսյանի այդ նախագիծը:

Հայաստանի Հանրապետության մշակույթի նախարարությունում տեղի է ունեցել նաև Վենետիկի 55-րդ բիենալեի հայկական տաղավարի հայեցակարգի և բովանդակային ձևավորման հայտերի քննարկումը: Ստացված 4 հայտերն են եղել Արման Գրիգորյանի «Հայկական նախագիծ»-ը, ԱԺՉ արվեստային կուրատորական խմբի «Նշանախոսության համայնագիտարան»-ը, Արչի Գալենցի «Հենակետ»-ը, Արարատ Սարգսյանի «Տղա Դավթի ու աղջիկ Խանդութի հեքիաթը»:

Հայտերը քննարկվել են համաձայն փորձագիտական հանձնաժողովի նախորդ նիստում սահմանված հետևյալ չափորոշիչների՝ նախագծում ներկայացվող գործերի կապը արվեստի զարգացման համաշխարհային միտումների հետ,նախագծի ներկայացուցչականությունը համատեքստում, նախագծի կապը Վենետիկի բիենալեի առաջարկած հայեցակարգի հետ, արծարծվող թեմայի, գաղափարի և նրանում կիրառված լեզվի արդիականությունը, ինչպես նաև համադրողի կողմից նախագծի կառավարման և իրականացման միջոցների առկայությունը: Վենետիկի բիենալեն ժամանակակից արվեստի կարևորագույն միջոցառումներից մեկը: