Գիտաժողով` նվիրված գրականագիտության մեթոդոլոգիայի խնդիրներին

Հայաստանի գրողների միությունը և cultural.am-ը ՀՀ նախագահի հովանու ներքո իրականացվող երիտասարդ գիտնականների աջակցության ծրագրի շրջանակներում կազմակերպում են գիտաժողով «Գրականագիտության մեթոդոլոգիայի հարցերը արդի փուլում: Պոստմոդեռնիզմ. 20 տարի անց» խորագրով:

Ինչպես այսօր լրագրողների հետ հանդիպմանը նշեց ծրագրի ղեկավար, գրականագետ Հասմիկ Խեչիկյանը, գիտաժողովի նպատակն է՝ համախմբել գրականության տեսությամբ զբաղվող երիտասարդ մասնագետներին և բարձրաձայնել գրականության առջև ծառացած հիմնախնդիրները: Գրականագետի խոսքով հատկապես 20-րդ դարի տեսական ուղղությունները դեռ յուրացված չեն. «Եթե չյուրացնենք, չենք կարողանալու անցնել առաջ , պարզելու , թե որտեղ ենք և ուր ենք գնում»:

Հասմիկ Խեչիկյանը նշեց, որ գրականագիտության մեջ ավելի ցրված է դաշտը և կա վերապահումով վերաբերմունք ժամանակակիցների հանդեպ: Պատճառները, ըստ գրականագետի, տարբեր են. դեռևս մեծ հատվածը , մասնավորապես ավագ սերունդը, հակված է մտածելու, որ բոլոր իզմերը և այդ թվում պոստմոդեռնիզմը օտարամոլություն է և ապազգային երևույթ:

Ասուլիսին ներկա էր նաև բանասիրական գիտությունների թեկնածու, գիտաժողովի կազմկոմիտեի անդամ Ալվարդ Սեմիրջյանը, որը նշեց, որ ոգևորությունը մեծ է գիտաժողովի անցկացման հետ կապված: Նա տեղեկացրեց, որ մոտ 70 մասնակից արդեն մասնակցում է գիտաժողովին, որից ավելի քան 40-ը զեկուցումներով:

Նրա կարծիքով սա բավականին լավ արդյունք է. «Հետաքրքրությունը մեծ է, և պետք է ստեղծել հնարավորություններ, որպեսզի հետաքրքրվող մարդիկ կարողանան դրսևորվել»:

Հասմիկ Խեչիկյանը նշեց, որ այն մասնագետները, որոնց զեկուցումները հետաքրքիր կլինեն, կշարունակվի նրանց հետ աշխատանքը, համագործակցությունը cultural.am-ի շրջանակներում:

Նրա տեղեկացմամբ գիտաժողովին կլինեն մասնակիցներ նաև Արցախից, Ռուսաստանի, Վրաստանից, Սիրիայից, իսկ հոդվածները կտպագրվեն առանձին գրքույկով:

Գիտաժողովի առաջին օրը կլինի լիագումար երկու նիստ ավագ սերնդի գրականագետների և արտերկրից ժամանած հյուրերի մասնակցությամբ, երկրորդ օրը աշխատանքները կտարվեն երկու սեկցիայով՝ 3-ական նիստ՝ շատ խիտ օրակարգով: Երրորդ օրը կլինեն կլոր սեղան-քննարկումներ, արդյունքների ամփոփում: Գիտաժողովն անցկացվում է ՀՀ նախագահի բարձր հովանու ներքո իրականացվող Երիտասարդ գիտնականների աջակցության ծրագրի շրջանակներում:

Գիտախողով կանցկացվի փետրվարի 8-10-ը Գրողների միության Ծաղկաձորի ստեղծագործական տանը: