Այսօր իմ աշխատանքային վերջին օրն է փոխնախարարի պաշտոնում․ Արթուր Մարտիրոսյան

Այսօր իմ աշխատանքային վերջին օրն է Կրթության, գիտության, մշակույթի և սպորտի նախարարի տեղակալի պաշտոնում։ Այս մասին հայտնում է Արթուր Մարտիրոսյանը։

«Ավարտվեց շուրջ 6,5 տարվա գործունեությունը հարազատ դարձած կառույցում: Իրապես կյանքի մի ամբողջական շրջափուլ՝ լի տարբեր փորձություններով և ձեռքբերումներով, մի տևական ժամանակ, երբ մարտահրավերներին (համավարակ, պատերազմ) դիմագրավելը զուգակցվել է լայնածավալ բարեփոխումներով։

Հպարտ եմ, որ այդ ամբողջ ընթացքում որպես որոշումների կայացման՝ Նախարարության ղեկավար թիմի անդամ առավել կամ պակաս չափով մասն եմ կազմել մարտահրավերների դիմագրավմանը, բարեփոխումների իրականացմանը, Նախարարության ինստիտուցիոնալ կարողությունների զարգացմանը։ Այդ բարեփոխումներից շատերն արդեն շոշափելի են մեր հանրության կյանքում, բայց, իհարկե, ավելի շոշափելի կդառնան երկարաժամկետ կրտվածքով։

Ուզում եմ խորին շնորհակալություն հայտնել ՀՀ վարչապետ Նիկոլ Փաշինյան-ին ինձ այս կարևոր դերակատարումը վստահելու՝ նախարարի տեղակալի կարգավիճակով Հայաստանի Հանրապետությանը ծառայելու հնարավորության համար։

Խորին շնորհակալությունս եմ ուզում հայտնել նաև պարոն Արայիկ Հարությունյան Arayik Harutyunyan-ին՝ ինձ պետական կառավարման համակարգ հրավիրելու և նորամուտի փուլում իր առաջնորդության համար։ Շնորհակալ եմ Նախարար պարոն Vahram Dumanyan-ին և, իհարկե, շնորհակալ եմ Նախարար տիկին Zhanna Andreasyan-ին առաջնորդության և համատեղ աշխատանքի համար։ Երախտիքի խոսք եմ ուզում հղել նաև մեր մեծ նախարարության ողջ աշխատակազմին, պետական կառավարման, տեղական ինքնակառավարման բոլոր գործընկերներին, դիվանագիտական ծառայության մեր գործընկերներին, քաղաքացիական հասարակության և միջազգային կազմակերպությունների գործընկերներին՝ համագործակցության և համատեղ աշխատանքի համար։

Ինձ ճանաչողները վստահաբար գիտեն, որ պաշտոնը դիտել եմ բացառապես որպես պետության և հանրության առջև ստանձնած հանձնառություն և այս ամբողջ ընթացքում փորձել եմ անել առավելագույնը պետության ինստիտուցիոնալ հիմքերի ամրապնդման, հանրային կյանքի բարեփոխման և մեր քաղաքացիների կյանքում իրական փոփոխությունների ուղղությամբ։
Ծառայում եմ Հայաստանի Հանրապետությանը։

Սիրում եմ Ձեզ

p.s. Օրվա խորհրդով սրտանց շնորհավորում եմ բոլորիդ Գիտելիքի և դպրության օրվա առթիվ»։