Հայաստանի ազգային պատկերասրահում բացվել է արաբական արվեստի ցուցահանդես

Հայ-քուվեյթյան մշակութային համագործակցության շրջանակներում 2013 թ. փետրվարի 3-10-ը Հայաստանում անցկացվում են Քուվեյթի մշակույթի օրեր: Քուվեյթյան 40 հոգուց բաղկացած պատվիրակությունը ղեկավարում է մշակույթի, արվեստների և նամակագրության Ազգային խորհրդի գլխավոր քարտուղար Ալի Հուսեյն Ալյուհան:Քուվեյթի մշակույթի օրերի պաշտոնական բացումը տեղի է ունեցել 2013 թ. փետրվարի 6-ին, Հայաստանի ազգային պատկերասրահում՝ արաբական արվեստը ներկայացնող ցուցահանդեսով:

Բացմանն ողջույնի խոսքով հանդես է եկել ՀՀ մշակույթի նախարար Հ. Պողոսյանը: Իր ելույթում նախարարը նշել է, որ մշակույթի օրերն իրականացվում են «Հայաստանի Հանրապետության կառավարության և Քուվեյթի Պետության կառավարության միջև մշակութային համաձայնագրի 2011-2013 թթ. համագործակցության մասին» գործնական ծրագրի շրջանակներում: Նախարարը համոզմունք է հայտնել, որ արաբական արվեստը ներկայացնող այս ցուցահանդեսն իր ուրույն ոճով և գունային վառ լուծումներով կգրավի հայ արվեստասերների ուշադրությունը:

Իսկ երեկոյան Հ. Պարոնյանի անվան երաժշտական կոմեդիայի պետական թատրոնում տեղի է ունեցել Քուվեյթի պետական ազգային անսամբլի ելույթը:

Հյուրախաղերը կշարունակվեն Գյումրիի կոնսերվատորիայում փետրվարի 7-ին, ժամը 16:00-ին:

Մշակույթի օրերի ընթացքում պատվիրակությունը կայցելի Հայաստանի պատմամշակութային վայրեր և մշակութային հաստատություններ: