Երեկ նշել են Ֆլորա Մարտիրոսյանի տարեդարձը

esyes.am-ը պատմել էր, որ երեկ մեծանուն երգչուհի Ֆլորա Մարտիրոսյանը կդառնար 56 տարեկան: Ցավոք, երգչուհին ժամանակից շուտ հեռացավ մեզնից, սակայն Ֆլորա Մարտիրոսյանի ընկերները հիշում են նրան և կենդանի պահում երգչուհու հիշատակը:
Երեկ Ֆլորա Մարտիրոսյանի երկրպագուների նախաձեռնությամբ «Նարեկացի» արվեստի միությունում հավաքվել են նրա ընկերները, հարազատներն ու երկրպագուները՝ հիշելու սիրելի երգչուհուն և նշելու նրա տարեդարձը: Ցերեկույթը փակ է եղել: Քրիստինե Պեպելյանի փոխանցմամբ՝ շատերը ներկա չեն եղել տեղյակ չլինելու պատճառով:

Ցերեկույթին ներկա են եղել Քրիստինե Պեպելյանը, Անդրեն, Ավետ Բարսեղյանը, Ալլա Լևոնյանը, Նորայր Ժամհարյանը, «Ժողովրդական երգիչ» նախագծի մասնակիցները (Ֆլորա Մարտիրոսյանն այդ նախագծում ժյուրիի անդամ է եղել) և այլք:

«Բոլորը երգում էին, տկն Ֆլորան սիրում էր, որ իր համերգների ժամանակ հանդիսատեսը երգում էր: Երեկ իր համար հավաքված մարդիկ բացարձակ նույն բանն արեցին: Երբ նայում էինք համերգային կադրերը, սրահում ներկաները սկսում էին երգել իր հետ՝ ի նշան այն բանի, որ բոլորն անում են այն քայլերը, որոնք ինքը սիրում էր: Հանդիպումն ավարտվեց ժողովրդական սիրուն պարային շարանով, ինչպես տկն Ֆլորան էր փակում իր համերգները, որպեսզի մարդիկ ուրախ տրամադրությամբ հեռանային»,- esyes.am-ին պատմեց Քրիստինե Պեպելյանը:
Երեկոյան Անդրեն, Ավետն ու Քրիստինեն գնացել են տկն Ֆլորայենց տուն, որտեղ եղել են նաև Երգի պետական թատրոնի մի քանի աշխատակիցներ, տկն Ֆլորայի ընկերուհին, բարեկամներն ու հարազատները:

«Ամեն մարդ իր մեջ ունի այդ ցավը: Իր բացակայությունը շատ է զգացվում: Շատ դժվար է գնալ մարդու տուն՝ նշելու իր ծնունդը, երբ ինքը չկա, մեզ հետ չի, գնում ես շնորհավորելու հենց այդ մեկին, ով չկա սեղանի շուրջ: Իսկապես շատ ծանր իրականություն է և շատ դժվար է դրա հետ հարմարվելը, հատկապես երբ հիշողություններ ունես այդ նույն տանը՝ կապված իր հետ՝ ինչպես է նա քեզ ընդունել, ինչ հումորներ, ճաշկերույթներ, հաճելի պատմություններ կան կապված այդ տան հետ: Սակայն ինքն այնքան կոլորիտով, ուրախ, դրական ու լուսավոր մարդ էր, որ մենք մեր առաջ առաջադրանք էինք դրել՝ լինել շատ բարձր տրամադրությամբ և այդ ծնունդն անցկացնել այնպես, ինչպես ինքը կցանկանար, կուրախանար…,- ասաց Քրիստինեն և հավելեց, որ իրենք բացել են տկն Ֆլորայի պատրաստած պահածոները՝ բադրիջանի պահածոն, վարդի հյութը, պոպոկի մուրաբան՝ վստահ, որ ինքն էլ այդպես կվարվեր: -Մենք ուղղակի լավ տրամադրությամբ մի ծնունդ արեցինք, քանի որ ինքը հաստատ պետք է «պահանջեր» մեզնից այդ տրամադրությունը»:

Երգչուհին պատմեց նաև, որ տորթ էին գնել և մոմեր՝ 56 թվով և փչել են մոմերը տկն Ֆլորայի համար: