Դեդ Հասանի սպանության ենթադրյալ պատվիրատու Ռովշան Ջանիևը հանգստանում է Դուբայում

Դեդ Հասանի սպանության ենթադրյալ պատվիրատու Ռովշան Ջանիևի եղբայր Էմիլը հայտարարել է, որ իր հարազատները մեղավոր չեն Ասլան Ուսոյանի սպանության մեջ: Որպես ապացույց՝ նա հայտնել է, որ Ռովշանն այժմ հանգստանում է Դուբայում. փոխանցում է 1News.az-ը: Ստամբուլում Ռովշան Ջանիևի սպանության մասին լուրը վրդովեցրել էր վերջինիս հարազատներին:

Հիշեցնենք, որ երեկ ռուսական ԶԼՄ-ներոմ տեղեկատվություն էր տարածվել այն մասին, որ Դեդ Հասանի սպանության ենթադրյալ պատվիրատու, ադրբեջանցի Ռովշան Ջանիևի դեմ մահափորձ էր իրականացվել Թուրքիայի Ստամբուլ քաղաքում, ավելի ուշ՝ փետրվարի 5-ին, ըստ տարածված լուրերի, Ջանիևը մահացել էր հիվանդանոցում:

«Դա ճիշտ չէ, իմ եղբայրը՝ Ռովշանը, կենդանի է, և ոչ ոք նրա դեմ մահափորձ չի իրականացրել: Նա եղել է Թուրքիայում, սակայն այժմ հագստանում է Դուբայում: Սակայն այն, ինչ մենք կարդում ենք մամուլում, ուղղակի զարհուրելի է: Ինչո՞ւ որևէ մեկը չի մտածում, թե ինչ են զգում նրա մայրը, երեխաները, բարեկամները, երբ կարդում են այդ լուրերը: Ինչո՞ւ են ընդհանրապես սուտ գրում»:

Էմիլի խոսքերով՝ այն, ինչ նա վերջին շրջանում կարդացել է մամուլում, հորինված է: «Ռովշանը կապ չունի Ասլան Ոսոյանի սպանության հետ, և դա քաջ հայտնի է հարգված մարդկանց: Դա ոստիկանության հորինածն է, որը, հավանաբար, ունի իր որոշակի նպատակները և հատուկ լարում է իրավիճակը: Նրանք նաև հորինել են Ռուֆաթ Նասիբովի սպանության մասին լուրը, որին, իբր, գնդակահարել են, ապա դին գցել ավտոմեքենայի բեռնախցիկի մեջ և տարել անհայտ ուղղությամբ: Նա կենդանի է»,-ասել է նա:

Հիշեցնենք, որ Մոսկվայի կենտրոնում հունվարի 16-ին սպանվել էր «օրենքով գող» Ասլան Ուսոյանը՝ հայտնի Դեդ Հասանը: Դեպքը տեղի էր ունեցել ժամը 14.30-ին՝ «Կարետնի դվոր» ռեստորանից դուրս գալիս: