Վրաստանն օտարերկրացիներին թույլատրել է բուհ ընդունվել առանց քննությունների

Վրաստանի կառավարությունը հաստատել է օտարերկրյա քաղաքացիների և քաղաքացիություն չունեցող անձանց բարձրագույն ուսումնական հաստատություններ ընդունվելու նոր կանոնները, հայտնում է Georgia Online-ը։

Այժմ օտարերկրացիները կկարողանան ընդունվել վրացական բակալավրիատի և մագիստրատուրայի ծրագրեր՝ առանց ազգային և միասնական քննություններ հանձնելու։ Միաժամանակ իշխանությունները խստացրել են լեզվի իմացության հաստատման պահանջները և ուսանողի կարգավիճակի պահպանումը կապել են երկրում օտարերկրացու գտնվելու իրավունքի հետ։

Վարչապետ Իրակլի Կոբախիձեի ստորագրած որոշման հիմնական մասն ուժի մեջ է մտել հրապարակումից անմիջապես հետո։ Նոր նորմերը տարածվում են 2026 թվականի սեպտեմբերի 1-ից ծագող իրավահարաբերությունների վրա։ Լեզվի իմացության պարտադիր ստուգման և դրա հավաստագրման պահանջները կսկսեն գործել 2027–2028 ուսումնական տարվանից։

Այդ պահից սկսած օտարերկրյա դիմորդը պետք է համալսարան ներկայացնի լեզվի իմացությունը հաստատող գործող միջազգային սերտիֆիկատ կամ հանձնի Ազգային գնահատման և քննությունների կենտրոնի կազմակերպած քննությունը։ Վրացերենով ուսուցման համար անհրաժեշտ կլինի հաստատել պետական լեզվի իմացությունը։

Բակալավրիատի, անասնաբուժական ծրագրերի, ինչպես նաև բժշկության և ատամնաբուժության դիպլոմային ծրագրերի համար սահմանվել է լեզվի իմացության նվազագույն B1 մակարդակ։ Մագիստրատուրա ընդունվելու համար կպահանջվի B2 մակարդակ։

Սերտիֆիկատը պետք է լինի գործող։ Եթե փաստաթղթում դրա գործողության ժամկետը նշված չէ, տրման պահից պետք է անցած լինի ոչ ավելի, քան երեք տարի։

Սովորելու թույլտվություն ստանալու համար դիմումը Կրթության որակի ապահովման ազգային կենտրոն կարող է ներկայացնել ինչպես հենց դիմորդը, այնպես էլ համալսարանը։ Դրական որոշումից հետո ռեկտորը կկարողանա ձևակերպել ընդունելությունը երկու ժամանակահատվածներից մեկում՝ փետրվարի 1-ից մարտի 15-ը կամ օգոստոսի 15-ից հոկտեմբերի 31-ը։

Միաժամանակ նոր կանոնները ուղղակի կապ են սահմանում օտարերկրյա ուսանողի առաջադիմության և Վրաստանում մնալու նրա իրավունքի միջև։ Եթե ուսումնական տարվա ընթացքում ուսանողը հավաքում է հնարավոր առավելագույն կրեդիտների քանակի մինչև մեկ երրորդը, համալսարանը պարտավոր է կասեցնել նրա ուսանողի կարգավիճակը։

Դրանից հետո գործի է դրվում միգրացիոն մեխանիզմը։ Եթե կարգավիճակի կասեցման պահից անցնում է 90 օր, կամ ուսանողը ինքնակամ դադարեցնում է ուսումը կամ ավարտում կրթական ծրագիրը, Պետական ծառայությունների զարգացման պետական գործակալությունը ստանում է նրա D6 կարգի ներգաղթի վիզան կամ կացության թույլտվությունն անվավեր ճանաչելու իրավունք։

Եթե Վրաստանում օտարերկրացու գտնվելու իրավունքը դադարում է կամ ընդունվում է նրա արտաքսման մասին որոշում, համալսարանը կկարողանա վերջնականապես դադարեցնել նրա ուսանողի կարգավիճակը։

Բացի այդ, բուհերը պարտավոր են ժամանակին օտարերկրյա ուսանողների վերաբերյալ տվյալները մուտքագրել Բարձրագույն կրթության կառավարման տեղեկատվական համակարգ։ Եթե տվյալները երեք աշխատանքային օրվա ընթացքում չգրանցվեն, դա կարող է հանգեցնել պատասխանատվության՝ վարչական իրավախախտումների վերաբերյալ օրենսգրքի համաձայն։