Թբիլիսիից Մոսկվա մեկնող չվերթի ուղևորները մնացել են օդանավակայանում՝ առանց ջրի և սննդի

Georgian Airways ավիաընկերության՝ Թբիլիսիից Մոսկվա մեկնող չվերթի շուրջ 200 ուղևորներ մնացել են Թբիլիսիի օդանավակայանում՝ առանց ջրի և սննդի։ Այս մասին հայտնում է Mash Telegram-ալիքը։

Ըստ աղբյուրի՝ ինքնաթիռը Թբիլիսիից օդ է բարձրացել սեպտեմբերի 21-ին՝ տեղական ժամանակով ժամը 23։55-ին, սակայն Մոսկվա հասնելուց մոտ մեկ ժամ առաջ շրջվել և վերադարձել է Վրաստանի մայրաքաղաք։ Ուղևորները ստիպված են եղել սպասել նստեցման ելքի մոտ, իսկ ավիաընկերության ներկայացուցիչները, ինչպես պնդում է Mash-ը, նրանց հետ չեն հանդիպել։

Նշվում է, որ չվերթի հետաձգման պատճառ կարող էին լինել Մոսկվայի «Վնուկովո» օդանավակայանում սահմանված սահմանափակումները։ Միաժամանակ աղբյուրը նշում է, որ դեպի «Վնուկովո» այլ չվերթներ իրականացվել են ըստ չվացուցակի։