«Հրապարակ». ՀԱԿ անդամների մի մասն այս փուլում կլքի Կոնգրեսը

Եթե մի կողմ թողնենք էմոցիաները և անդրադառնանք Լևոն Տեր-Պետրոսյանի հարցազրույցի առարկայական կողմին, ապա այն, ըստ
էության, ՀԱԿ-ը կուսակցություն դարձնելու մանիֆեստ էր: Եվ այս պարագայում դժվար է զսպել առաջին ռեակցիան և չասել՝ վաղուց ժամանակն էր:

Ի վերջո, կուսակցություններից և անհատներից կազմված անհասկանալի այդ կոնգլոմերատը, որը ոչ հայտարարված սկզբունքներ ուներ, ոչ պլատֆորմ, ոչ հստակ կառուցվածք և կառավարման համակարգ, ժամանակավոր երևույթ էր՝ պահի թելադրանքով ստեղծված: Իշխանափոխության նպատակով ստեղծված: Եվ անկախ նրանից՝ կատարել է իր առջև դրված խնդիրը, թե ոչ՝ պետք է հեռանա պատմության թատերաբեմից: Մարդկության պատմությունը քաղաքական պայքարի հստակ կառույցներ է ստեղծել, և հեծանիվ հորինելու իմաստը պարզապես չկա: Ուզենք, թե չուզենք՝ քաղաքական պայքարի գործիքը կուսակցություններն են, և «ոչ կուսակցություն-ոչ հասարակական կազմակերպություն» վիճակը երկար շարունակվել չէր կարող: Թերևս, եթե ավելի վաղ սկսեին այս գործընթացը, այն այդքան ցավոտ և կորուստներով լի չէր լինի: Բնական է, որ ՀԱԿ
անդամների մի մասն էլ այս փուլում կլքի Կոնգրեսը, բայց չենք կարծում, որ դա ավելի մեծ աղետ է, քան մշտապես կոնֆլիկտային մթնոլորտում, անգործունակ ու անիմաստ կառույցը պահել-պահպանելը: 

Մի բան վատ է, որ այս որոշումն էլ, ինչպես բոլոր նախորդները, կայացվել է միանձնյա՝ առաջնորդի կողմից, առանց քննարկման, առանց գործընկերների կարծիքը հարցնելու: Գուցե բացառություն է կազմում Ստեփան Դեմիրճյանը, որին օրեր առաջ այցելած առաջնորդը, հուսանք, հենց այս հարցն է քննարկել ՀԺԿ ղեկավարի հետ: Ամեն դեպքում, պետք է արձանագրենք, որ դեմոկրատական որոշումներ կայացնելն իրենց
դեմոկրատական հռչակած ուժերի մոտ ոչ մի կերպ չի ստացվում: