«ՀԺ». Մեր հարևանը կրկին մեզանից մի քանի քայլ առաջ է

Սահակաշվիլիի՝ Վրաստանի նախագահ դառնալուց հետո այդ երկրում տեղի ունեցած փոփոխությունները տարիներ շարունակ զարմացնում էին մեզ՝ հայաստանցիներիս ու շատ հարցերում նախանձ շարժում: Ըստ «ՀԺ»-ի՝ հիմա Սահակաշվիլին ըստ էության իշխանություն չունի, ու հիմա մեզ շարունակում է զարմացնել «Իվանիշվիլիի Վրաստանը»:

Վերջին օրերին այդ երկրում սկսել է էժանանալ հացը: Այդ մասին երեկ տեղեկացրել է «Վրաստանի արդյունաբերողների միության» նախագահ Մալխազ Դոլիձեն: Վերջինիս խոսքերով, հացի գնի նվազումը պայմանավորված է այն հանգամանքով, որ վերջին շրջանում մեծացել են ալյուրի ներկրման ծավալները, և երկրում մրցակցային միջավայր է ստեղծվել: Դոլիձեի խոսքերով, մրցակցության շնորհիվ առաջիկայում հացի գինը կշարունակի նվազել: Օրերս հայտնի է դարձել, որ Վրաստանում միջինը 25 տոկոսով նվազել է սպառողներին մատակարարվող էլեկտրաէներգիայի գինը: Մոտ 10 տոկոսով նվազել է բենզինի գինը: Եվ այդ ամենը այդ համակարգերում առկա կոռուպցիոն մեխանիզմների
բացահայտման և մրցակցային միջավայր ստեղծելու շնորհիվ: Ուշագրավ է հատկապես, գազի գնի նվազման փաստը: Վրաստանը Ադրբեջանից գազը գնում էր 167 դոլարով, իսկ բնակիչներին այդ նույն գազը վաճառվում էր 300 դոլարով: Հիմա սպառողների համար գազը էժանացել է
մոտ 10 տոկոսով: Այսինքն՝ վրաստանցիները գազի համար վճարում են մոտ 270 դոլար: Դա նշանակում է, որ սահմանի վրա գազի գնի և բնակիչներին մատակարարվող գազի գների տարբերությունը՝ մարժան 133 դոլարից նվազել է մինչև 103 դոլարի: Հայաստանում սահմանի վրա գազը արժե 180 դոլար, իսկ բնակիչներին այն վաճառվում է 325 դոլարով: Այսինքն մարժան 145 դոլար է: Ստացվում է, որ մեր բնակիչը հիմա մոտ 40 տոկոս ավելի շատ գումար է վճարում գազը իր տուն հասցնելու համար, քան վրացիները:

Ընդ որում, վրացական իշխանությունները հայտարարում են, որ գազի գինը նույնպես կշարունակի նվազել: Դժվար է ասել, թե Վրաստանում իրականացվող այս փոփոխությունները որքանով են տնտեսապես արդարացված, արդյո՞ք մի քանի ամիս հետո չի պարզվի, որ գազը կրկին պետք է թանկանա, որպեսզի համակարգը ինքնածախսածածկվի: Բայց այս պահին կարող ենք ընդամենը արձանագրել, որ մեր հարևանը
կրկին մեզանից մի քանի քայլ առաջ է: