«Ժողովուրդ». Դեղերը թանկացել են

Երեկ «Ժողովուրդ» օրաթերթն ահազանգ է ստացել ՀՀ քաղաքացիներից, որ առաջնային անհրաժեշտության և ամենամեծ պահանջարկ ունեցող սրտանոթային մի քանի դեղեր թանկացել են: Ահազանգի հետքերով թերթը շրջեց Երևանի մի քանի դեղատներում և պարզեց, որ «Պրեստարիում» դեղամիջոցը 3900 դրամից դարձել է 4500, «Պրեստանս»-ի մեծածախ գինը 6250-ից դարձել է 7300:

Թանկացել են նաև «Սանոֆի-Ավենտիս» ֆիրմայի դեղերը: Օրինակ՝ շատ օգտագործվող «Էսենցիալե ֆորտե»-ն 2400-ից դարձել 12700
դրամ: Դեղերի և բժշկագիտական տեխնոլոգիաների փորձագիտական կենտրոնի փոխտնօրեն Ալբերտ Սահակյանը «Ժողովուրդի» հետ
զրույցում ասաց. «Պետք է հավատալ քաղաքացիների ահազանգին, որովհետև 581 անուն դեղի շրջանակներում ուսումնասիրություններ ենք արել և արձանագրել, որ գրեթե նույն պատկերն է ցույց տալիս: Մենք համապատասխան հաղորդագրություն կտարածենք այս մասին, և դուք
կտեսնեք, որ դեղերի մի մասի գները նվազել են, իսկ մի մասն էլ բարձրացել է: Այո, 10-ից 20 տոկոս թանկացում կա: Բայց մենք դրան զուգահեռ ուսումնասիրել ենք նաև արտադրողների գները և պարզել, որ եվրոպական արտադրողը նույնպես բարձրացրել է»: Սահակյանի խոսքով՝ թանկացման պատճառը պայմանավորված է եվրոյի կուրսի աճով. «Մեր դիտարկումները դա են ցույց տվել»:

Իսկ ՀՀ տնտեսական մրցակցության պաշտպանության պետական հանձնաժողովի մամլո խոսնակ Գայանե Սահակյանը թերթի հետ զրույցում ասաց. «Եթե հանձնաժողովը թեժ գծով ահազանգ ստանա կամ դիմում-բողոք, ապա անմիջապես ընթացք կտանք և համապատասխան ուսումնասիրություններ կանցկացնենք»: