«Հ1»-ը «Եվրատեսիլ-2013-ի» համար մոտ 50 երգի հայտ է ստացել, բայց քանակը դեռեւս որակ չէ. Գոհար Գասպարյան

«Եվրատեսիլ-2013-ում» Հայաստանը ներկայացնող երգիչ Գոռ Սուջյանի համար Հայաստանի հանրային հեռուստաընկերությունն ստացել է մոտ 50 երգի հայտ, սակայն, ցավոք, քանակը որակ չի տալիս: Այս մասին NEWS.am STYLE-ի թղթակցի հետ զրույցում ասաց «Եվրատեսիլի» հայկական պատվիրակության ղեկավար Գոհար Գասպարյանը:Հայտերի մեծամասնությունը «Հ1»-ն ստացել է արտերկրից. «Իհարկե, որակական իմաստով չէի ասի, որ հուսադրող են: Նրանք այն կոմպոզիտորներն են, որոնք երգեր ուղարկում են մի քանի տեղ, դեռ հետաքրքիր եւ ակնհայտ լիդեր երգ չկա»,- ասաց նա:

Գոհար Գասպարյանը նշեց, որ երգերի հայտերն ընդունվում են մինչեւ փետրվարի 20-ը եւ իրենք մեծ հույսեր են կապում հայ կոմպոզիտորների հետ, ովքեր զանգում են, հետաքրքրվում են եւ երեւի մյուս շաբաթ արդեն կներկայացնեն հայտեր: «Հույս ունենք, որ հայ կոմպոզիտորների երգերից մի բան կընտրենք»,- նշեց նա: Հայ կոմպոզիտորներից երգի հայտ են պատրաստվում ներկայացնել Գռռ Սուջյանը, Արա Մարտիրոսյանը, Լազառոն:

Հանրային հեռուստաընկերությունը ներկայացված հայտերից պատրաստվում է ընտրել առավելագույնը 5 երգ, թեեւ դա կախված կլինի որակից, հնարավոր է նաեւ ավելի քիչ: Երգի ընտրությունը կկատարվի ազգային ընտրությամբ` հեռուստադիտողների sms հաղորդագրությունների եւ պրոֆեսիոնալ ժյուրիի քվեարկությամբ: Հայաստանյան ազգային ընտրությունը կկայանա մարտի 2-ին Առաջին ալիքի ուղիղ եթերում, որի ընթացքում Գոռ Սուջյանը կկատարի մրցույթին ներկայացված լավագույն երգերը: «Եվրատեսիլ 2013»-ին կհնչի այն երգը, որը ժյուրիի եւ հեռուստադիտողների քվեարկության (50/50) արդյունքում կհավաքի ամենաբարձր միավորները:

Ավելի վաղ NEWS.am STYLE-ը հայտնել էր, որ Հայաստանի Հանրային հեռուստաընկերության գեղարվեստական հանձնաժողովի ներքին ընտրությամբ 2013թ.-ի Եվրատեսիլ երգի մրցույթին Հայաստանը կներկայացնի երգիչ Գոռ Սուջյանը:

Նշենք, որ 2013թ մայիսի 14-ին, 16-ին եւ 18-ին Շվեդիայի Մալմո քաղաքում տեղի կունենա Եվրատեսիլ երգի մրցույթը: Ավելի վաղ Հայաստանի Հանրային հեռուստաընկերությունը հայտարարել էր Հայաստանի մասնակցի ներքին ընտրության մասին: