«168 ժամ». «Քաղաքագիտական վերլուծությունից» հետո Տեր-Պետրոսյանի ու Քոչարյանի շահերը սկսեցին համընկնել

ՀԱԿ առաջնորդ Լևոն Տեր-Պետրոսյանը հերթական անգամ ցույց տվեց, որ ժողովրդավարական հռչակված իր քաղաքական թիմում որոշումները կայացվում են բացառապես իր կողմից, և «քաղաքական ուժ» հորջորջվող նրա շրջապատի անդամներն իրականում ընդամենն իր որոշումները վավերացնելու գործառույթ ունեն: Ճիշտ այնպես, ինչպես Ազգային ժողովն է դակում կառավարության որոշումները: Նախօրեին Տեր-Պետրոսյանը՝ որպես ՀԱԿ անդամ կուսակցությունների հետ դեռևս քննարկվող գաղափար`ներկայացրեց Կոնգրեսը կուսակցության վերակազմակերպելու մասին նախաձեռնությունը:

Նախ պարզվեց, որ ՀԱԿ անդամ գոնե հիմնական կուսակցությունների՝ ՀԺԿ-ի, ՀՀՇ-ի հետ նման հարց չի քննարկվել, ապա ՀՀՇ-ն վարչության նիստ արեց, ու պարզվեց, որ ոչ միայն քննարկվել է, այլ՝ որ դա ամենահանճարեղ որոշումն է: Մնացած ընթացակարգերը՝ ժողովներ, նիստեր, համագումար, ընդամենը ձևական բնույթ են կրելու: Քանի որ մինչ ՀՀՇ-ն որոշել է համագումար հրավիրել այդ հարցում դիրքորոշում ձևավորելու նպատակով՝ ՀՀՇ վարչության փոխնախագահ Սամվել Աբրահամյանը և վարչության անդամ Աշոտ Սարգսյանը արդեն իսկ հայտնվել են այն «անհատների» ցանկում, ովքեր դիմել են Արդարադատության նախարարություն՝ ՀԱԿ կուսակցություն գրանցելու համար:

Փաստորեն, եթե կուսակցությունը համագումարում հակառակ որոշում կայացնի, ապա ՀՀՇ-ն կպառակտվի: Սակայն դա գործնականում անհավանական է, քանի որ ՀՀՇ վարչության երեկվա նիստից հետո արդեն իսկ բոլորը գիտակցել են Տեր-Պետրոսյանի որոշման իմաստնությունը: Սակայն ՀԱԿ կուսակցության նախաձեռնողների ցանկում միայն ՀՀՇ-ականների առկայությունը չէ: Արդարադատության նախարարություն
դիմած խմբի անդամների մի մասը տարբեր բարձր պաշտոններ է զբաղեցրել Ռոբերտ Քոչարյանի իշխանության տարիներին...

Քաղաքականության մեջ, ինչպես հայտնի է, պատահականություններ չեն լինում: Ռոբերտ Քոչարյանը ևս ժամանակին ՀՀՇ անդամ էր և իշխանության գալուց հետո սկսեց ակտիվորեն պայքարել ՀՀՇ-ի դեմ: «Քաղաքագիտական վերլուծությունից» հետո Լևոն Տեր-Պետրոսյանի ու Ռոբերտ Քոչարյանի շահերը սկսեցին համընկնել այնքան, որ արդեն իսկ նրանց սպասարկող քաղաքական միավորների՝ ՀԱԿ- ի ու ԲՀԿ-ի
համագործակցությունը համարվում է առաջիկա քաղաքական զարգացումների հիմնական սցենարներից մեկը: Դեռևս 2008 թվականի մարտի 1-ին իր առանձնատանը հրավիրված ասուլիսում պատասխանելով հարցին՝ հնարավո՞ր է որևէ կերպ պատկերացնել Ռոբերտ Քոչարյանի հետ իր համագործակցությունը, Լևոն Տեր-Պետրոսյանը հայտարարեց՝ քաղաքականության մեջ ոչինչ չի բացառվում: Հինգ տարի անց նա
վերահաստատում է դա՝ արդեն գործողություններով»: