ՀՀ մշակույթի նախարարն ընդունել է ՀՀ-ում Ավստրիայի Հանրապետության արտակարգ և լիազոր դեսպանին

Երեկ ՀՀ մշակույթի նախարար Հասմիկ Պողոսյանն ընդունել է ՀՀ-ում Ավստրիայի Հանրապետության արտակարգ և լիազոր դեսպան Ալեոս Կրաուտին /նստավայրը՝ Վիեննա/: Հանդիպման ընթացքում կողմերը զրուցել են 2010 թ. «Ավստրիայի Հանրապետության կրթության, արվեստի և մշակույթի նախարարության, Հայաստանի Հանրապետության մշակույթի նախարարության և Հայաստանի Հանրապետության կրթության և գիտության նախարարության միջև» փոխըմբռնման հուշագրի շրջանակում առաջիկայում իրականացվելիք մշակութային ձեռնարկների շուրջ: Մասնավորապես, քննարկվել են ս. թ. ապրիլ ամսին «Երևանյան հեռանկարներ» փառատոնի շրջանակում Վիեննայի ֆիլհարմոնիկ նվագախմբի hայաստանյան համերգի մանրամասները: Քննարկվել են նաև հուլիսին Կոմիտասի անվան կամերային երաժշտության տանը կայանալիք համատեղ հոգևոր երաժշտության համերգի և Ավստրիայի մայրաքաղաք Վիեննայում հայկական մշակույթը ներկայացնելու ձևաչափի հետ կապված հարցեր:

Հասմիկ Պողոսյանն Ալեոս Կրաուտին առաջարկել է նաև համագործակցել Հայոց ցեղասպանության 100 ամյակի շրջանակում՝ ՀՀ մշակույթի նախարարության և Հայոց ցեղասպանության թանգարան-ինստիտուտի կողմից իրականացվող Ֆրանց Վերֆելի «Մուսա լեռան 40 օրը» վեպի բազմալեզու հրատարակումների ցուցահանդեսներ կազմակերպելու և համանուն ֆիլմ նկարահանելու ծրագրի համատեքստում: