Անահիտ Սիմոնյանը` բիզնես-լեդի

Հավանաբար քչերը գիտեն, որ երգչուհի Անահիտ Սիմոնյանի բեմական հագուստների մեծ մասի հեղինակը հենց ինքն է:

Երգչուհին այժմ փորձում է իրեն դրսևորել նորաձևության ոլորտում և հնարավորություն ընձեռել իր ոճը սիրողներին ևս կրել իր մոդելավորած զգեստները: Այս և այլ հարցերի շուրջ ArmStar.am – ը զրուցեց Անահիտի հետ:

-Անահիտ, մի փոքր պատմեք Ձեր նոր բիզնեսի մասին, որը պատրաստվում եք բացել... :
- Իմ մոդելավորած զգեստների խանութն ունենալու ցանկություն վաղուց կար և ուշ թե շուտ դա պետք է անեի: Սկզբնական շրջանում կգործի միայն փոքրիկ ատելիեն, որտեղ արվելու են հագուստի հետ կապված տարբեր աշխատանքներ՝ սկսած ուղղակի հագուստի ձևափոխությունից մինչև կարելու պատվերներ:
Ես այնտեղ կունենամ իմ առանձնասենյակը, որտեղ կլինեն իմ էսքիզները: Նրանք, ովքեր կցանկանան անհատական հագուստ պատվիրել հենց ինձ մոտ, կմոտենան ինձ, կընտրենք կտորը և, ամենայն հավանականությամբ, կկարենք երեկոյան զգեստներ:
Երգչուհին նշեց, որ իր հագուստները հեղինակել է դեռ դպրոցական տարիներից:
-Իմ բեմական հագուստների մեծ մասը ես եմ մոդելավորել, ապա դրանք կարել են դերձակները: Անգամ ունեմ դպրոցական հագուստներ, որոնք ես եմ կարել:
-Անահիտ, կարծես թե սերը մոդելավորման և նորաձևության աշխարհի հանդեպ մեծ է եղել վաղուց, այդ դեպքում ինչու՞ որպես մասնագիտություն չընտրեցիք հենց այդ ճյուղը:
-Քանի որ 10 տարեկանից նաև երգել եմ, մեծ ցանկություն ունեի հանդես գալ որպես երգչուհի: Այժմ, երբ երգարվեստում ավելի ամուր եմ կանգնած, որոշեցի ավելի լուրջ զբաղվել իմ հոբբիով:
-Իսկ պատվիրատուներ արդեն ունե՞ք, և արդյո՞ք նրանց մեջ կան հայտնի մարդիկ:
-Պատվիրատուները դեռևս ուղղակի քաղաքացիներ են, իսկ հայտնիներից 5-ի հետ ես ֆոտոշարք կանեմ, որից հետո այդ հագուստները կնվիրեմ նրանց: Առաջարկն իմն է եղել:
- Ի՞նչ եք կարծում, Հայաստանում «աշխատող» են նման կարի արտադրամասերը:
-Եթե վերցնենք միայն ատելիեն, ապա կարծում եմ, որ այն շատ լավ կաշխատի: Իսկ ինչ վերաբերվում է իմ դիզայներական աշխատանքներին, ապա դա ճաշակի հարց է:
-Հետաքրքիր է, իսկ առիթ եղե՞լ է խորհրդակցել մեր դիզայներների հետ:
-Այո, իհարկե, զրուցել եմ Արևիկ Սիմոնյանի,Արամ Նիկոլյանի, Ֆաինայի հետ: Ասել եմ, թե ինչ եմ ուզում ձեռնարկել, և նրանք պատրաստ են իրենց խորհուրդներով լինել կողքիս: Սակայն այդ խորհուրդները կապ չունեն հագուստի մոդելավորման հետ: Դրանք միայն վերաբերվում են բիզնեսի հարցերին:
-Բնականաբար յուրաքանչյուր բիզնես հետապնդում է շահույթ, այս fashion-studiօ-ն առաջին հերթին բիզնե՞ս է, թե …

-Բիզնես, նախասիրություն և սիրած աշխատանք: Ատելիեն կգործի Սպենդիարյան 5 հասցեում: Այն կբացվի արդեն մեկ շաբաթից: Սակայն «բացում», որպես այդպիսին, չենք անի: Ատելիեն հատուկ անուն դեռ չի ունենա, սակայն դրսից դիզայնով այն կտարբերվի և բոլորը կհասկանան, որ այն իմն է:

Այս աշխատանքներն ավարտելուց հետո նոր կսկսենք զբաղվել իմ խանութի հարցերով, որն արդեն կկոչվի իմ անունով: