«Կիսաբաց լուսամուտներում» հյուրերի խոսքը ստուգվելու է հատուկ սարքի միջոցով

Այսուհետ սկանդալային պատմություններ ներկայացնող «Կիսաբաց լուսամուտներ» թոք-շոուի հյուրերի խոսքերի ճշմարտացիությունը որոշվելու է համապատասխան սարքի միջոցով: esyes.am-ի հետ զրույցում այս մասին ասաց հաղորդման վարող և պրոդյուսեր Հրաչ Մուրադյանը: Հրաչի խոսքերով, սա բավականին թանկարժեք ծառայություն է, որը Atv-ին՝ մասնավորապես «Կիսաբաց լուսամուտները», պատվիրում է իտալական «Նոմենցո» ընկերությունից: Վերջինը միաժամանակ համագործակցում և բոլոր տվյալները ստուգում է մոսկովյան ստի միջազգային ակադեմիայի կողմից: «Այսինքն՝ յուրաքանչյուր տվյալ, որն ասում ենք, ստուգված է, ոչ միայն Հայաստանի, այլև Մոսկվայի ստի միջազգային ակադեմիայի կողմից: Առաջարկն ինձ արել է «Նոմենցո» ընկերությունը, երբ սարքը բերել է Հայաստան: Որպես ծրագրի պրոդյուսեր՝ ծանրութեթև անելով ու ղեկավարության հետ քննարկելով, հասկացանք, որ դրա միջոցով հնարավոր կլինի շատ ավելի մեծ հարցեր բարձրացնել ու լուծում տալ: Ժամանակի ընթացքում լինում էին հացեր, որոնց պատասխաններն օդում կախված էին մնում ու անավարտ գրքի նման ամեն մեկս մեր եզրակացությունն էինք անում, իսկ այս դեպքում 99,9 ճշտությամբ հեռուստադիտողին տալիս ենք ինֆորմացիա: Հայաստանում սրա նախադեպը չի եղել»,- ասաց հաղորդավարը:

Տեղեկացնենք, սակայն, որ սարքը ոչ բոլոր թողարկումներում է գործածվելու. «Կկիրառվի միայն հատուկ դեպքերում, երբ լինի դրա անհրաժեշտությունը: Այն կիրառվում է, երբ վկաներ չկան և կողմերից ամեն մեկն իրենն է պնդում: Առաջին անգամ սարքի օգնությանը դիմել ենք այն ժամանակ, երբ քույրը պնդում էր, որ եղբայրը 15 տարեկանից բռնաբարել է իրեն, իսկ եղբայրը պնդում էր, որ նման բան չի եղել: Սարքի արդյունքները ցույց տվեցին, որ իրենց մոտ սիրային կապ է եղել, իսկ բռնաբարության մասին խոսք չկա: Սարքի միջոցով, կարելի է ասել, ջրի երես ենք հանում իրականությունը, որովհետև մոսկովյան ստի միջազգային ակադեմիան տալիս է տվյալներ՝ 99,9 տոկոս ճշտությամբ»:

Պալիգրաֆ կոչվող սարքը տեղադրվում է տաղավարում: Այն իրենից հեշտ աշխատանք չի ներկայացնում: Հրաչից պարզեցինք նաև, որ սարքը հատուկ թեստերի միջոցով է արդյունքները հրապարակում: «Յուրաքանչյուր թեստը տևում է մինիմում երեք ժամ: Վերջին դեպքում, հյուրերից մեկն այն 12 ժամվա ընթացքում է անցել,- ասաց հաղորդավարն ու հավելեց, որ դա հեշտ աշխատանք չէ, որը կարելի է եթերում անել: -Այսինքն՝ մինչև եթերն ենք ճշտում կամ եթերից հետո' երկրորդ թողարկման համար, եթե դրա անհրաժեշտությունը կա: Սակայն հեռուստադիտողները հատված առ հատված տեսնում են նաև թեստը: Ամբողջ ինֆորմացիան չի թույլատրվում հեռարձակել՝ հաշվի առնելով անձնական կյանքի գաղտնիության իրավունքը»:

Հյուրերը հարցերին պատասխանում են այո կամ ոչ: Սարքը երեք տեսակ զգայարանների՝ արյան, սրտի և քրտնագեղձերի տվյալներ է ստանում, ըստ որոնց պարզ է դառնում նա ճի՞շտ է խոսում, թե՞ ոչ:

Առաջիկայում պլանավորված է սարքի առկայությամբ ևս երեք հաղորդում նկարահանել, որոնք եթերում կլինեն փետրվարին և մարտին:
Հրաչի համոզմամբ, սարքի կիրառումը նոր գույն է տվել հաղորդմանը. «Միանշանակ նոր գույն ունի: Թեև ծրագիրը հաջողություն ունի և, հաշվի առնելով մի շարք ռեյթինգներ, հայկական հեռուստադաշտում համարվում է առաջատարը, մենք էլ ժամանակի ընթացքում հետաքրքրություն, նորություն և էվոլյուցիա պետք է ապահովենք»,- esyes.am-ին ասաց Հրաչ Մուրադյանը:

Հիշեցնենք, որ «Կիսաբաց լուսամուտների» առաջին եթերը եղել է 2010-ի դեկտեմբերի 13-ին:

Ի դեպ, այս սարքն օգտագործում է նաև Չինաստանը, Ճապոնիան և այլ երկրներ՝ տարբեր նպատակներով: «Օրինակ այն գործածվում է աշխատանքի ընդունվելիս՝ հասկանալու տվյալ անձնավորության պոտենցիալը: Երկրներ կան, որոնք օգտագործում են սարքը դատական մարմիններում և այն օրինական ուժ ունեցող եզրակացություն ունի: Այս սարքից օգտվում են նաև համաշխարհային փորձ ունեցող հեռուստաընկերություններ BBC-ին CNN-ը»,-ավելացրեց Հրաչը: