Միհրանը սովորել է անվերապահորեն սիրել

Մեր ամենազբաղված հայրենակիցներից մեկը՝ ամերիկաբնակ պարող Միհրան Կիրակոսյանը, հնարավորություն է ունեցել հավելյալ ժամեր անցկացնել ընտանիքի անդամների հետ, քանի որ նշել է իր ծննդյան տարեդարձը :): Oրերս էլ նա ժամանակ է տրամադրել BRAVO.am-ին եւ անձնական ու գործնական կյանքից որոշ մանրամասներ պատմել:

Ծննդյան օրը նշել է երկու օր անընդմեջ

Ծննդյանս նախօրեին՝ հունվարի 26-ին, ես եւ ընկերներս գնացինք ճաշելու, այնուհետեւ ակումբ՝ պարելու: Իսկ ծննդյանս օրն անցկացրել եմ ընտանիքիս՝ զույգ աղջիկներիս, կնոջս ու ծնողներիս հետ:

Չի հասցնում շատ ժամանակ տրամադրել ընտանիքին

Ընտանիքիս հետ անցկացնում եմ այնքան ժամանակ, որքան ինձ թույլ է տալիս զբաղվածությունս: Ինչ խոսք՝ դա բավարար չէ: Այնուամենայնիվ, ամեն շաբաթ ես ունենում եմ հստակ ժամեր, որոնք տրամադրում եմ միայն ու միայն կնոջս ու փոքրիկներիս:

Հասկացել է, թե ինչ է անվերապահ սերը

Հայր դառնալուն պես դարձել եմ ավելի համբերատար ու հասկացող ուսուցիչ: Հասկացել եմ, թե ինչ է նշանակում սիրել անվերապահորեն: Օր օրի, աղջիկներիս ճանաչելով, ունենում եմ հիանալի զգացողություններ: Ճիշտ է՝ նրանք ինձնից շատ բաներ են սովորում, բայց շատ բաներ էլ ես եմ սովորում նրանցից:

Պետք է փոքրուց ճանաչեն Հայաստանը

Դեռ չեմ պլանավորում Հայաստան գալ: Բայց վստահ եմ՝ շուտով ընտանիքով կայցելենք. ուզում եմ՝ երեխաներս փոքրուց ծանոթ լինեն հայոց պատմությանը, մշակույթին ու հայերին, քանի որ դա է իրենցը:

Այս պահին ուշադրության կենտրոնում Լուարան է

Շարունակում եմ համագործակցել տարբեր հեռուստանախագծերի ու արտիստների հետ, բայց այս պահին ինձ համար առաջնայինը Լուարան է: Արդեն մեկ տարի է՝ աշխատում ենք միասին: Վերջերս կայացել է նրա «Fire in me» տեսահոլովակի պրեմիերան: Այս տարվա հետ կապված մենք դեռ շատ մեծ պլաններ ունենք: