«168 ժամ». ՀԱԿ-ը կուսակցության վերածելու ծրագրին անգամ Սերժ Սարգսյանի ֆանտազիան չի օգնի

«Առաջին նախագահն առանց ՀՀԿ-ի ապօրինի աջակցության՝ չի կարող ՀԱԿ-ը վերակազմավորել նոր քաղաքական միավորի, քանի որ ոչ այդ հնարավորությունը ունի և ոչ էլ համապատասխան ՀԱԿ-ային փաստաթղթեր: Ավելին, ՀԱԿ-ի անդամների գերակշռող մասը միշտ դեմ է եղել նման նախաձեռնությանը՝ կուսակցության վերածմանը, այդ թվում և մենք՝ «Մարդու իրավունքներ-96»-ը: Այսինքն այս պայմաններում անգամ Սերժ Սարգսյանի ֆանտազիան չի օգնի այդ նախաձեռնության իրականացմանը»,- թերթի թղթակցի հետ զրույցում անդրադառնալով ՀԱԿ-ը կուսակցության վերակազմավորելու Լևոն Տեր-Պետրոսյանի նախաձեռնությանը, ասել է ՀԱԿ անդամ, «Մարդու իրավունքներ-96» կուսակցության նախագահ Ռուբեն Թորոսյանը:

Նրա կարծիքով, իրականում այդ նախաձեռնությունը նշանակում է ՀՀՇ-ի և ՀԺԿ-ի միավորում, որի հետ իրենք գործ չունեն: Ռուբեն Թորոսյանը նշել է նաև, թե ով կարող է լինել նորաստեղծ կուսակցության ղեկավարը: «Լավ կլինի, որ այդ նոր կուսակցության ղեկավարը Գագիկ Ջհանգիրյանը լինի, կամ ԲՀԿ-ից որևէ մեկին բերեն: Այդ, այդ դեպքում, ամեն ինչ իր տեղը կընկնի վերջնականապես»,- ասել է «Մարդու իրավունքներ-96»-ի նախագահը:

Ինչ վերաբերում է իր ղեկավարած կուսակցության հետագա գործողություններին, ապա, Ռուբեն Թորոսյանի խոսքերով՝ այն կշարունակի գործել ՀԱԿ-ի շրջանակներում (իբրև Երևանի ավագանու ՀԱԿ խմբակցություն) և կփորձի վերադարձնել ՀԱԿ-ի հռչակագրային հեղինակությունը, քանի որ Կոնգրեսի ստեղծման պատճառները դեռևս առկա են: «Հսկայական պոտենցիալ կա հռչակագրային ՀԱԿ-ում, ի՞նչ վատ կլինի, որ այն նորից
վերականգնվի, նորից եմ կրկնում քանի որ նրա ստեղծման հիմքերը մնում են: ՀԱԿ-ից հեռանալու միակ ճանապարհն այն է, որ հայտարարվի՝ հետ եմ վերցնում ստորագրությունս հայտնի Հռչակագրից, իսկ առայժմ որևէ մեկը դա չի անում, ես նույնպես»,- ասել է նա: