«Առավոտ». Րաֆֆի Հովհաննիսյանը չի շնորհավորի Սերժ Սարգսյանին

Նախագահի թեկնածու Րաֆֆի Հովհաննիսյանի ընտրական շտաբի խոսնակ Հովսեփ Խուրշուդյանը «Առավոտի» հետ զրույցում արձագանքելով Հրանտ Բագրատյանի ասածներին, երբ վերջինս արտահայտել էր իր դիրքորոշումը՝ կապված միասնական թեկնածուի գաղափարի հետ, ասելով, որ կմիանա այդ գաղափարին, եթե թեկնածուները հայտարարեն, որ իրենք ընդդիմադիր են, և որ Սերժ Սարգսյանի ընտրվելու դեպքում պաշտոն չեն ստանձնելու, Խուրշուդյանն ասաց.

«Մամուլից տեղեկացանք պարոն Բագրատյանի նախապայմաններին: Նախ ասեմ, որ մեզ համար տարօրինակ է իրար հետ բաց նամակներով կամ անուղղակի այլ ձևով շփման ոճը, քանի որ Րաֆֆի Հովհաննիսյանը միշտ բաց է եղել անմիջական շփման համար, պարբերաբար կապի մեջ է լինում գործընկերների հետ անմիջապես կամ հեռախոսակապով: Անդրադառնալով միասնական թեկնածուով հանդես գալու գաղափարին՝ նշեմ, որ Րաֆֆի Հովհաննիսյանը ասել է, որ պատրաստ է քննարկել այդ տարբերակը առանց նախապայմանների: Ինչ վերաբերում է ընդդիմություն լինել-չլինելուն, ապա մտահոգիչ է այն, որ մինչ այժմ Հրանտ Բագրատյանի համար Րաֆֆի Հովհաննիսյանի՝ բազմամյա քաղաքական գործունեությունից պարզ չի դարձել նրա՝ ընդդիմություն լինելու փաստը: Վերջապես՝ մենք այսօր արդեն կարող ենք ասել, որ Րաֆֆի Հովհաննիսյանը չի շնորհավորի Սերժ Սարգսյանին, քանի որ ազատ և օրինական ընտրությունների դեպքում Րաֆֆի Հովհաննիսյանը կհաղթի, և միակ «պաշտոնը», որ նա կստանձնի, լինելու է նախագահի պաշտոնը, որը նա համարում է ընդամենը սեփական ժողովրդին ծառայելու հնարավորություն: Եվ ով որ իսկապես ընդդիմադիր է՝ պետք է հավատա ժողովրդի հաղթանակին և ապահովի այն»: