Արցախյան շարժումը պետք է ավարտվի Հայաստանին Արցախի դե յուրե միավորմամբ

Հայաստանի Նախախորհրդարանն ու «Սահմանադրական Արցախ» շարժումը հանդես են եկել համատեղ հայտարարությամբ, որն ընդունվել է այսօր՝ 2013 թ. փետրվարի 12-ին, Հադրութում՝ Արցախի հարցի վերջնական և հայանպաստ լուծման հեռանկարի վերաբերյալ տեղի ունեցած համատեղ քննարկման ընթացքում։

Ստորև ներկայացնում ենք Նախախորհրդարանի լրատվական ծառայության տարածած հաղորդագրությունը։

Հայաստանի Նախախորհրդարանի ու «Սահմանադրական Արցախ» շարժման հայտարարությունը

25 տարի առաջ՝ 1988 թ. փետրվարի 12-ին, Հադրութում ծնունդ առավ Արցախյան շարժումը, որն օրերի ընթացքում հասավ Ստեփանակերտ, ապա Երևան ու վերածվեց հուժկու համաժողովրդական շարժման՝ որպես արդյունք արձանագրելով երկու մեծագույն ձեռքբերում: Դրանցից մեկը Արցախի պատմական տարածքների մի զգալի մասի ազատագրումն ու փաստացի միացումն էր Հայաստանին, իսկ մյուսը' Հայաստանի ինքնիշխանության վերականգնումը:

Սակայն, դրա հետ մեկտեղ, ձևավորվեցին ազգային շահերի հաշվին անձնական և կլանային շահերի իրացմանը ծառայող պետական կառավարման համակարգ ու վերնախավ, որոնց գործունեության հետևանքով հայությունը հայտնվել է Արցախյան շարժման ձեռքբերումները կորցնելու վտանգի առջև:

Հայաստանի Նախախորհրդարանը և «Սահմանադրական Արցախ» շարժումը, առաջնորդվելով Արցախյան շարժման ձեռքբերումներն ամրապնդելու ու զարգացնելու հրամայականով, հայտարարում են, որ.

1. մեր ժողովրդի արյան ու պայքարի գնով ձեռք բերածն անսակարկելի է,
2. ազատագրված տարածքները պետք է վերաբնակեցվեն և զարգացվեն,
3. Արցախյան շարժումը պետք է ավարտվի Հայաստանին Արցախի դե յուրե միավորմամբ,
4. Արցախի հարցի վերջնական ու հայանպաստ լուծումը հնարավոր է միայն համահայկական համատեքստում՝ Հայաստանում (ներառյալ Արցախը) ազգային նպատակներ և խնդիրներ առաջադրելու ու իրականացնելու ունակ կառավարման համակարգ ունեցող պետության միջոցով,

5. 25 տարի անց, հանուն ազգային վերածննդի' հայությունը վերսկսում է ինքնիշխանության, քաղաքական ազատության ու սոցիալական արդարության հաստատման համար իր պայքարը: