Ինչո՞ւ է հանվել ցուցահանդեսից Հասմիկ Պողոսյանի ծաղրանկարը (լուսանկարներ)

«Հայ Արտ» մշակութային կենտրոնում ներկայացված է երիտասարդ նկարիչ Տիգրան Հակոբյանի, նույն ինքը՝ Tiqs-ի անհատական երկրորդ ցուցահանդեսը: Ցուցահանդեսին ներկայացվել է 41 աշխատանք՝ ՀՀ նախագահի թեկնածուների, հայկական ու արտասահմանյան շոու-բիզնեսի մի շարք ներկայացուցիչների, գրողների, դերասանների ծաղրանկարներ: 

Ցուցահանդեսին ներկայացված են Էմի Ուայնհաուսի, Սիրուշոյի, Հովհաննես Ազոյանի, Հրաչ Մուրադյանի, Նազենի Հովհաննիսյանի, ինչպես նաև Շառլ Ազնավուրի, Սիլվա Կապուտիկյանի, Վահան Տերյանի, Մհեր Մկրտչյանի, Յոհան Վոլֆգանգ Գյոթեի, Սալվադոր Դալիի, Ֆրիդա Կալոյի, ՀՀ նախագահի թեկանծուներ Սերժ Սարգսյանի, Րաֆֆի Հովհաննիսյանի, Պարույր Հայրիկյանի, Անդրիաս Ղուկասյանի, Հրանտ Բագրատյանի և Արամ Հարությունյանի  և այլոց ծաղրանկարները: Tiqs-ի ծաղրանկարների շարքի մեջ ներառված էր նաև ՀՀ մշակույթի նախարար Հասմիկ Պողոսյանի ծաղրանկարը, սակայն, երբ այցելեցինք «Հայ Արտ»՝ ներկայացված ծաղրանկարները տեսնելու, նկատեցինք, որ Հասմիկ Պողոսյանի ծաղրանկարը բացակայում է: Երբ հարցրինք տեղի աշխատակցին, թե որտեղ է Հասմիկ Պողոսյանի ծաղրանկարը, աշխատակիցն ասաց. «Հայ Արտ» մշակութային կենտրոնի տնօրեն Ռիտա Շառոյանը չի ցանկացել, որ այն ցուցադրվի:

Թե ինչու ծաղրանկարը չի ցուցադրվել, Lurer.com-ը փորձեց պարզել հենց հեղինակից: Հարցին ի պատասխան՝ Տիգրան Հակոբյանն ասաց.

«Ճիշտն ասած, ես եմ որոշել՝ այդ նկարը չցուցադրվի, որ նրան շատ չվիրավորեմ, քանի որ այն ամենասուրն էր: Ճիշտն ասած, չգիտեի Հասմիկ Պողոսյանի բնավորությունը. հասկացա, որ չարժի նրան նեղացնել իմ ծաղրանկարով: Ռիտա Շառոյանի մոտ է ծաղրանկարը, երբ Հասմիկ Պողոսյանը կտեսնի ու չի վիրավորվի։ Այդ ժամանակ նոր կտեղադրենք»:

Հ.Գ. Փաստորեն, ինչ ուզում եք, արեք, սրբություն սրբոց Հասմիկ Պողոսյանին հանկարծ չկպնեք: Ցանկանո՞ւմ եք, հոգ չէ, ծաղրանկարներ արեք նախագահի թեկնածուներին, քիչ թե շատ ճանաչված դեմքերի, բայց ոչ Հասմիկ Պողոսյանին, չէ՞ որ նա կարող է վիրավորվել:

 {gallery}tiqs{/gallery}