Ներկայացրել են համատեղ իրականացրած ծրագրերը և առաջիկա անելիքները

Այսօր ՀՀ մշակույթի նախարարությունում կայացած մամուլի ասուլիսին ՀՀ մշակույթի նախարար Հասմիկ Պողոսյանը և ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը ներկայացրել են 2012 թ. համատեղ իրականացրած և համագործակցության շրջանակներում 2013 թ. նախատեսվող մշակութային ծրագրերը:

Մշակույթին աջակցությունը ՎիվաՍել-ՄՏՍ-ի կորպորատիվ պատասխանատվության մասն է կազմել ընկերության գործունեության առաջին իսկ օրվանից: Ընդհանուր առմամբ, ընկերությունը մշակութային նախագծերի իրականացման համար հատկացրել է շուրջ 6,5 միլիարդ դրամ, որից` 952,8 միլիոնը 2012 թ., իսկ 2013 թ. տարբեր ծրագրերի իրականացման համար կհատկացվի 1,204 միլիարդ դրամ:

Ընկերության աջակցությունը մշակույթի ոլորտին չի սահմանափակվում ազգային մշակույթի առաջխաղացմանը նպաստելով. ոլորտին ՎիվաՍել-ՄՏՍ-ի աջակցությունը նաև մշակութային երկխոսությանը նպաստելու և գալիք սերունդներին կրթելու նպատակ ունի:

ՎիվաՍել-ՄՏՍ-ի աջակցությամբ իրականացված ծրագրերն առանձնանում են ոլորտների և ոճերի բազմազանությամբ. աջակցություն Հայոց ցեղասպանության թանգարան-ինստիտուտին` թանգարանային և ցուցադրական փաստաթղթերի ձեռքբերման հարցում, «Օպերացիա «Նեմեսիս»» ներկայացման բեմադրման հովանավորություն և այլն:

Մշակութային ծրագրերի բազմազանության պարագայում անգամ ուշադրության կենտրոնում է դասական երաժշտությունը: Ընկերությունը ֆինանսական աջակցություն է ցուցաբերել Իտալիայի դեսպանատան նախաձեռնությամբ «I Solisti Veneti»-ի համերգի կազմակերպմանը, «Ազգային պատկերասրահ» դասական երաժշտության, Գյումրիի «Վերածնունդ» և «Վերադարձ» երաժշտական փառատոներին:

Ընկերությունն աջակցություն է ցուցաբերում Հայաստանի ֆիլհարմոնիկ, Հայաստանի երիտասարդական նվագախմբերին, Կոմիտասի անվան լարային քառյակին, «Բարեկամություն» անսամբլին, Պետական ակադեմիական երգչախմբին, ինչպես նաև՝ անհատ ստեղծագործողների: ՎիվաՍել-ՄՏՍ-ը նաև հովանավորում է «Հանրային ռադիոյի ոսկե ֆոնդ» անթոլոգիայի ստեղծման աշխատանքները:

Այս տարի տասնամյա գործունեությունը նշող «Ոսկե ծիրան» միջազգային կինոփառատոնը հիանալի հնարավորություն է ևս մեկ անգամ Հայաստանն աշխարհին, իսկ աշխարհը՝ Հայաստանին ներկայացնելու համար: Ընկերությունն արդեն ութերորդ անգամ ստանձնել է փառատոնի հովանավորությունը:

Վիվասել-ՄՏՍ-ը «Երևանը՝ գրքի համաշխարհային մայրաքաղաք» ծրագրի շրջանակում հովանավորել է «Via Libri» նախագիծը: Ընթերցանության տարածմանն ուղղված նախագծերին աջակցությունը նպատակ ունի դպրոցներում ամրապնդելու ընթերցանության մշակույթը, նպաստելու մշակութային, սոցիալական և տնտեսական զարգացմանն առավել պատրաստ երիտասարդության ձևավորմանը:

2013 թ. մշակույթի նախարարությունը շարունակելու է հանդես գալ բազմաթիվ հետաքրքիր նախաձեռնություններով` երաժշտարվեստի, թատերարվեստի, պարարվեստի, կինոյի և այլ ոլորտներում, ինչպես նաև մանուկների, պատանիների և երիտասարդների համար նախատեսված մի շարք ծրագրերով:

Ծրագրային նման բազմազանությունը կարող է կյանքի կոչվել միայն կորպորատիվ գործընկերների աջակցությամբ: Գործընկերներ, որոնց մղումն ազնիվ է՝ աջակցել ոչ միայն հայ ժողովրդի մշակութային ինքնության պահպանմանն ու զարգացմանը, այլև' Հայաստանում համաշխարհային հարուստ մշակութային ժառանգության ներկայացմանը: Մշակույթի նախարարությունը գնահատում է աշխարհին հայկական մշակույթի ներկայացմանն ուղղված՝ Հայաստանում հեռահաղորդակցության առաջատար օպերատորի հետ երկարաժամկետ և կայացած համագործակցությունը: Յուրաքանչյուր հասարակության պատմության հիմքում իր արվեստն ու մշակույթն է: Այս ճշմարտությունն ընդունելով, ՎիվաՍել-ՄՏՍ-ն ապացուցել է ժամանակակից հայ մշակույթի բարեկամ լինելու իր վճռականությունն ու աջակցել իր բարձր դիրքերը պահպանելուն ուղղված` մշակույթի ոլորտի ջանքերը: