Գիշերօթիկների երեխաները կդառնան սկաուտներ

Հայաստանի ազգային սկաուտական շարժում «ՀԱՍԿ» ՀԿ-ի կենտրոնական գրասենյակում ՀՀ կրթության և գիտության նախարար Արմեն Աշոտյանը, ՀՀ աշխատանքի և սոցիալական հարցերի նախարար Արտեմ Ասատրյանը և Հայաստանի ազգային սկաուտական շարժման ատենապետ Հրաչյա Շմավոնյանը ստորագրել են փոխադարձ համագործակցության եռակողմ հուշագիր:

Հուշագրի նպատակը սոցիալապես անապահով ընտանիքիների և կյանքի դժվարին պայմաններում հայտնված երեխաների ներգրավվածության ապահովումն է սկաուտական շարժմանը՝ որպես արտադպրոցական կրթության կարևոր բաղադրիչ:

Կարևորելով նախաձեռնությունը՝ ՀՀ կրթության և գիտության նախարար Արմեն Աշոտյանը շնորհակալություն է հայտնել Հայաստանի ազգային սկաուտական շարժմանը և նշել, որ մեկնարկող «Անապահով երեխաների կազմակերպական զարգացում և ներգրավվածություն» ծրագիրն ունի երկու կարևոր բաղադրիչ՝ սոցիալական և դաստիարակչական: «Աշակերտների ռազամահայրենասիրական և արտադպրոցական դաստիարակության կազմակերպումը կրթական համակարգի կարևոր խնդիրներից է: Նման ծրագրերում հանրային սեկտորի երիտասարդական և ռազմահայրենասիրական կազմակերպությունների ներգրավվածությունն արդյունավետ և արդարացված է: Խիստ կարևոր է նաև ծրագրի սոցիալական բաղադրիչը»,- շեշտել է նախարարը և հավելել, որ ծրագիրը համատեղելի է ՀՀ ԿԳՆ և ՀՀ աշխատանքի և սոցիական ապահովության նախարարությունների համագործակցության գերակայություններին և նպատակներին: Նախարարը նաև տեղեկացրել է, որ ՀՀ կրթության և գիտության նախարարությունը «Բլոգնյուզ» կայքի հետ համատեղ նոր ծարգիր է սկսել, որը նպատակ ունի բացահայտել սոցիալական խնդիրների պատճառով դպրոցներից դուրս մնացած երեխաներին և, գնահատելով նրանց կարիքները, նպաստել խնդիրների լուծմանը: «Ոչ մի երեխա սոցիալական պատճառներով պետք է դուրս չմնա դպրոցից, դա մեր գերակա նպատակն է»,- հայտարարել է Ա. Աշոտյանը:

Համատեղ «Անապահով երեխաների կազմակերպական զարգացում և ներգրավվածություն» ծրագրի իրագործումը կիրականացվի «Խաղաղության սուրհանդակներ» առաքելության շրջանակում: Ծրագրի ընդհանուր արժեքը մոտ 18 մլն դրամ է, որը դրամաշնորհային կարգով ՀԱՍԿ-ին տրամադրել է Համաշխարհային Սկաուտական շարժման “Messengers of Peace” հիմնադրամը։ Ծրագրում, որը նախատեսվում է իրականացնել ՀՀ 7 մարզերում մինչև 2014 թվականը, կներգրավվեն գիշերային խնամքի կենտրոններում և հարակից բնակավայրերում ապրող 12-18 տարեկան մոտ 1400 սոցիալապես անապահով երեխաներ: 2013-14 թվականների ընթացքում՝ յուրաքանչյուր տարի 700 երեխայի համար ՀԱՍԿ-ը կկազմակերպի սեմինարներ, սկաուտական դասընթացներ, արշավներ և բանակումներ: