Ամերիկան պետք է շարունակի աջակցել Հայաստանի պաշտպանության ոլորտի բարեփոխումներին. Չաք Հեգել

«Միացյալ Նահանգները ցանկանում է խորացնել ռազմական և քաղաքական համագործակցությունը Հայաստանի հետ»,-հայտարարել է ԱՄՆ նախագահ Բարաք Օբամայի կողմից պաշտպանության նախարարի պաշտոնին առաջադրված Չաք Հեգելը:

Պատասխանելով Սենատի զինված ուժերի հանձնաժողովի նախագահ Քարլ Լեվինի հարցին, թե ինչ է պատրաստվում անել՝ խորացնելու Վաշինգտոնի և Երևանի ռազմական կապերը, Հեգելը նշել է. «Պաշտպանության ոլորտում Հայաստանի և Միացյալ Նահանգների հարաբերություններն ամուր են: Նշեմ, սակայն, որ նույնիսկ առկա հարաբերությունների մակարդակը հաշվի առնելով՝ երկկողմանի կապերի և գործընկերության ամրապնդման համար հեռանկարներ ևս առկա են»:

«Եթե իմ թեկնածությունը հաստատվի, ես կշարունակեմ խրախուսել Հայաստանի ղեկավարությանը, որ ամրապնդվի առկա համագործակցությունը: Մենք նաև կարող ենք համագործակցության նոր ոլորտներ հայտնաբերել»,-նշել է Հեգելը:

Պենտագոնի ղեկավարի պաշտոնին առաջադրված Հեգելը նաև ասել է. «Մենք պետք է շարունակենք աջակցել Հայաստանում ընթացող պաշտպանության ոլորտի բարեփոխումները, մասնավորապես՝ հայկական խաղաղապահ ջոկատների գործունեությանը, որ Հայաստանը կարողանա շարունակել իր մասնակցությունը խաղաղապահ գործողություններին»:

Հեգելի համաձայն՝ Վաշինգտոնը նաև հույս ունի, որ Հայաստանի ռազմական ղեկավարությունը հետագայում ևս կնպաստի տարածաշրջանային անվտանգությանը և կայունության ամրապնդման ուղղված ջանքերը: Այս մասին նշում է Asbarez.com կայքը: