«Երևան Ջուր» ՓԲԸ ներդրել է հեռաչափման on-line համակարգ

Հունվար ամսին «Երևան Ջուր» ՓԲԸ գործունեության մեջ արձանագրվեց հերթական լուրջ ձեռքբերումը. մայրաքաղաքի ջրամատակարարման ցանցի արդիականացման և տեխնիկական վերազինման ծրագրերի շրջանակներում եռամսյա աշխատանքներից հետո սկսեց գործել հեռաչափման համակարգը: Ընկերության կողմից սպասարկվող տարածքի ջրաղբյուրներում, օրվա կարգավորման ջրամբարներում, բաշխիչ ցանցի հանգուցային կետերում, այլ վայրերում արդեն իսկ տեղադրվել է հայրենական արտադրության GPRS համակարգի թվով 80 հաղորդիչ, որի շնորհիվ առկա չափիչ սարքերի՝ ջրի ճնշման տվիչների, ջրի մակարդակաչափերի, հոսքաչափերի և այլն կողմից գրանցվող տվյալները ինքնաշխատ եղանակով, 5 րոպե հաճախականությամբ մուտքագրվում են ընկերության համակարգչային բազա:

Դա հնարավորություն է տալիս թե՛ բացառել մարդկային գործոնն իր բոլոր թերություններով և թե՛ ուղղակիորեն՝ on-line ռեժիմով հետևել ջրի շարժին ողջ համակարգում, ինչն ապահովում է գործընթացներին ժամանակին միջամտելու, այդ թվում վթարներին արագ արձագանքելու, հնարավորություն: Ընդ որում, նշված հաղորդիչներում սահմանված են որոշակի տեխնիկական չափանիշներ, որոնց խախտման դեպքում անմիջապես տրվում տագնապի ազդանշան, օպերատորին տեղյակ պահելով համակարգի տվյալ կառույցում առաջացած խնդրի մասին:

Ըստ ընկերության Տեխնիկական տնօրինության մշտադիտարկման և ռազմավարության վարչության պետ Վահրամ Մաճկալյանի՝ նմանատիպ սարքերի տեղադրումը ջրամատակարարման բաշխիչ ցանցում շարունակվելու է, ընդգրկելով վերջինիս բոլոր կառույցներն ու գործառույթները, ինչպես նաև ապահովելով առավելագույն իրազեկում համակարգում առկա իրավիճակի վերաբերյալ: Ավելին, հետագայում նախատեսվում է տեղադրել հեռակառավարման համակարգ ևս, որի շնորհիվ հնարավոր կդառնա նաև կառավարել համակարգը մեկ կենտրոնից, նորից առանց մարդկային միջամտության ու ժամանակ կորցնելու՝ ի շահ սպառողի:

Անցած ամիսը դրական է բնութագրվել նաև ամենօրյա գործառույթների իրականացման առումով: Այսպես, հունվարին Երևանում շուրջօրյա ջրամատակարարում է ունեցել բաժանորդների 70,3%-ը, 17-23 ժամ՝ 26,4%-ը և 12-17 ժամ՝ ընդամենը 3,3%-ը: Ինչ վերաբերում է ջրի որակին, ապա «Երևան Ջուր» ՓԲԸ ջրի լաբորատորիայի կողմից համակարգի 1484 կետից վերցվել է փորձանմուշներ, որոնց ստուգման արդյունքները ցույց են տվել, որ սպառողներին մատակարարվող ջրի որակը համապատասխանել է գործող սանիտարական նորմերի և կանոնների պահանջներին:

Ղեկավարվելով «Մենք հաշվետու ենք հանրության առջև» կարգախոսով, «Երևան Ջուր» ընկերությունը ստորև ներկայացնում է հերթական ամենամսյա հրապարակումը 2013թ. հունվար ամսվա գործունեության մի շարք հիմնական ցուցանիշների վերաբերյալ' 2012թ. նույն ժամանակամիջոցի նկատմամբ /2008թ. տվյալները համեմատության համար են/: