ՌԴ Սվերդլովսկի մարզի պատվիրակությունը՝ ԱԺ-ում

ՀՀ ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը եւ արտաքին հարաբերությունների մշտական հանձնաժողովի նախագահ Արտակ Զաքարյանը փետրվարի 13-ին հանդիպում ունեցան եվրասիական ինտեգրման հարցերով Ռուսաստանի Դաշնության Սվերդլովսկի մարզի Եկատերինբուրգ քաղաքից ժամանած պատվիրակության հետ, որին ուղեկցում էր Եվրասիական համագործակցության հիմնադրամի նախագահ Մհեր Սիմոնյանը:

Պատվիրակության ղեկավար, Ուրալի պետական տնտեսագիտական համալսարանի ռեկտոր Միխայիլ Ֆյոդորովը նշեց, որ եվրասիական ինտեգրման գործընթացներում մեծապես կարեւորվում է երիտասարդների մասնակցությունը եւ հատկապես այդ տեսանկյունից արժեւորեց համագործակցությունը Հայ-ռուսական (սլավոնական) համալսարանի հետ: Եվրասիական համագործակցության հեռանկարներին անդրադառնալով՝ հյուրերը մատնանշեցին այն հնարավորությունները, որ տարածաշրջանային համագործակցության զարգացմամբ կստեղծեն եւ կիրացնեն ԱՊՀ երկրները՝ շնորհիվ ընդհանուր շահերի ու նպատակների: Նրանք ներկայացրին նաեւ արդեն իսկ հաջողությամբ իրագործված ծրագրեր ԱՊՀ անդամ որոշ երկրների մասնակցությամբ: ՌԴ-ում եվրասիական ինտեգրման գաղափարի նպատակով իրականացվող տարբեր ծրագրերի մասին խոսեցին պատվիրակության անդամ, Նովոուրալսկ քաղաքային օկրուգի ղեկավար Վլադիմիր Մաշկովը եւ Եվրասիական ինտեգրման զարգացման հիմնադրամի նախագահ Սերգեյ Պորխաչյովը:

Մհեր Սիմոնյանը տեղեկացրեց, որ պատվիրակությունը կլոր սեղանի է մասնակցելու Հայ-ռուսական (սլավոնական) համալսարանում, որի ընթացքում կքննարկվեն մի քանի ծրագրեր:

Ողջունելով պատվիրակության այցը խորհրդարան՝ Արտակ Դավթյանը նշեց, որ Հայաստանում պարբերաբար քննարկվում է եվրասիական ինտեգրման հարցը. այն գտնվում է քաղաքական ուժերի ուշադրության կենտրոնում:

ԱԺ արտաքին հարաբերությունների մշտական հանձնաժողովի նախագահը նկատեց, որ եթե եվրասիական ինտեգրման գաղափարը Հայաստանում դեռեւս որպես նորույթ է ընկալվում, ապա Ռուսաստանի Դաշնության հետ մեր բարեկամական կապերն ունեն ոչ միայն երկար տարիների պատմություն, այլեւ ռազմավարական նշանակություն: Կարեւորվեցին տնտեսական համագործակցության ծրագրերը, ընդգծվեց, որ Հայաստանում միշտ ողջունվել են տնտեսական ինտեգրմանն ուղղված քայլերը: Արտակ Զաքարյանի խոսքով՝ Հարավային Կովկասում առկա իրավիճակում պետք է երկկողմ ու բազմակողմ, բազմավեկտոր համագործակցության միջոցով կարողանալ լուծումներ գտնել ապագայի կայուն եւ խաղաղ զարգացման համար: Մյուս կողմից՝ ժամանակակից աշխարհը լի է տարբեր մարտահրավերներով, որոնք միայնակ հաղթահարել հնարավոր չէ, ուստի ինտեգրման բոլոր ուղիները կարեւոր նշանակություն են ստանում: Նրա կարծիքով՝ եվրասիական ինտերգրման շուրջ համագործակցությունը Հայաստանին ավելի լայն հնարավորություններ կարող է տալ Ռուսաստանի Դաշնության հետ առկա ռազմավարական հարաբերությունները զարգացնելու եւ հատկապես տնտեսական կապերի ուժեղացման տեսանկյունից:

ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահն իր խոսքում կարեւորեց եվրասիական համագործակցությունը՝ որպես ընդհանուր խնդիրների լուծման հարթակ: Արտակ Դավթյանը համոզմունք հայտնեց, որ նմանատիպ այցերը, քննարկումները մեծապես կնպաստեն գործընթացի արդյունավետությանը:

Հայ խորհրդարանականները շնորհակալություն հայտնեցին հյուրերին՝ բարձրացված մի շարք հարցերին հանգամանալից պատասխանելու համար: