«168 ժամ». Ինչպե՞ս են ծանոթացել Րաֆֆի Հովհաննիսյանն ու իր կինը

ՀՀ նախագահի թեկնածու, «Ժառանգություն» կուսակցության նախագահ Րաֆֆի Հովհաննիսյանի կինը՝ Արմինե Հովհաննիսյանը պատրաստ է հանդես գալ Առաջին տիկնոջ դերում և պատասխանատվություն ստանձնել: Ա. Հովհաննիսյանը «168 ժամի» թղթակցի հետ զրույցում պատմել է, թե ինչպես են իրենք ծանոթացել: Առաջին անգամ նրանք միմյանց տեսել են Սան Ֆրանցիսկոյում՝ հայ երիտասարդների համաժողովի
ընթացքում: «Այդտեղ տեսա գեղեցկադեմ հայ մի երիտասարդի, և բոլորը պտտվում էին նրա շուրջը: Ես չգիտեի՝ ո՞վ է այդ երիտասարդը: Հետո ասացին, որ Րաֆֆի Հովհաննիսյանն է: Նրա անունը լսել էի, քանի որ, անշուշտ, բոլորիս հայտնի էր Ռիչարդ Հովհաննիսյանի անունը, և լսել էի, որ նա Րաֆֆի Հովհաննիսյան անունով տղա ունի: Սակայն այդ ժամանակ մենք ընդամենը բարևեցինք իրար, չնայած այդ համաժողովին և՛
ինքն էր ակտիվ, և՛ ես»,-պատմել է Ա. Հովհաննիսյանը: 

Իսկ ո՞րն է եղել 27 տարվա ամուսինների փոխանակած առաջին նախադասությունը: «Օ, երեկ դու շատ գեղեցիկ գուլպաներ էիր հագել»,- առաջին հեռախոսազրույցի ընթացքում իր ապագա տիկնոջն ասել է Րաֆֆի Հովհաննիսյանը: «Ես զարմացել էի, բայց հետո հիշեցի, որ մեկ օր առաջ հայկական եկեղեցու պիկնիկն էր Վաշինգտոնում, և այն ժամանակ նորաձև էր՝ հագել էի կարճ գուլպաներ: Նա նկատել էր դա: Մեր
խոսակցությունը միանգամից ջերմ սկսվեց, ապա ինձ հրավիրեց հարևան նահանգ, որտեղ դասախոսություն պետք է կարդար Արևմտյան Հայաստանի մասին: Ընդունեցի հրավերը, և հայ ընկերուհուս հետ գնացինք»,- հիշել է «Օրրան» բարեգործական կազմակերպության տնօրեն Արմինե Հովհաննիսյանը: