«168 ժամ». ԲՀԿ-ն կմասնակցի Երևանի ավագանու ընտրություններին

Եթե ՀՀ կառավարությունն այսօր՝ փետրվարի 14-ին կայանալիք նիստում հաստատի «Երևանի ավագանու հերթական ընտրություն
նշանակելու մասին» ՀՀ կառավարության որոշման նախագիծը, ապա Երևանի ավագանու հերթական ընտրությունները տեղի կունենան 2013թ. մայիսի 5-ին: Քաղաքական ուժերից որո՞նք թեկնածու կառաջադրեն այդ ընտրություններին: Ըստ կանխատեսումների՝ ի տարբերություն նախագահական ընտրությունների, բավական թեժ պայքար է սպասվում Երևանի քաղաքապետի ընտրությունների ընթացքում:

«Ժառանգություն» կուսակցության մամուլի խոսնակ Հովսեփ Խուրշուդյանը «168 ժամի» թղթակցի հետ զրույցում ասել է, որ մասնակցելու են ընտրություններին: Հիշեցնենք, որ Երևանի ավագանու առաջին ընտրություններին, որոնք տեղի ունեցան 2009թ. մայիսի 31-ին, «Ժառանգություն» կուսակցությունը չմասնակցեց: «Տրամադրվածությունը կա, վաղաժամ է հատուկ որոշում կայացնել: Թող նախագահական ընտրություններն անցնեն, դրանով կզբաղվենք»,- ասել է Խուրշուդյանը: ԲՀԿ մամուլի խոսնակ Տիգրան Ուրիխանյանը, պատասխանելով նույն հարցին, նշել է, որ ամենայն հավանականությամբ, կուսակցությունը կմասնակցի այդ ընտրություններին. «Հաշվի առնելով, որ դրանք, թերևս, կուսակցական ընտրություններ են, կարծում եմ՝ այո, բայց կոնկրետ քննարկում դեռ չենք ունեցել»,- նշել է խոսնակը: Հարցին, թե արդյո՞ք նախագահական ընտրություններին չմասնակցելը բացասաբար չի անդրադառնա կուսակցության վարկանիշի վրա նաև Երևանի ավագանու ընտրությունների ընթացքում, Տիգրան Ուրիխանյանը պատասխանել է. «Հիշեցնում եմ բոլորին, որ «Բարգավաճ Հայաստան» կուսակցությունը երբևէ որևէ նախագահական ընտրության չի մասնակցել, բայց դա բացարձակ չխանգարեց, որ մենք վերջին խորհրդարանական ընտրություններին շուրջ կես միլիոնի հասնող քվեներ ստանանք: Այս ընտրություններին չմասնակցելն էլ չի խանգարի, որպեսզի որևէ այլ կուսակցական ընտրության մենք հավաքենք էլ ավելի մեծ թվով ձայներ»: