«Հրապարակ».Նախագահը, որքան էլ որ համոզվածություն ունի, թե 100-ից 80 են «խփելու», բոլորովին էլ վստահ չէ

«Հրապարակը» խմբագրականում գրում է. «Նրանք, ովքեր գրում են Սերժ Սարգսյանի նախընտրական ելույթները, կարծում եմ, շատ լավ ուսումնասիրել են մեր ժողովրդի հոգեբանությունը: Համենայնդեպս, նրա վերջին ելույթները կառուցված են մեր ժողովրդի խղճի, ներողամտության, «ականջով սիրելու և զգալու» որակների վրա:

Երեկ, լսելով 5 տարի նախագահի պաշտոնում աշխատած անձի սրտաբուխ խոսքն ու ժողովրդին ուղղված խնդրանքները՝ իրեն հնարավորություն տալ շարունակելու աշխատանքը, հասկացա, որ «սպիչմեյկերները» շատ լավ են աշխատել: Ճիշտ ինտոնացիաներ, ազդեցիկ շեշտադրումներ և առավելագույն անկեղծություն՝ ահա թե ինչի վրա են կառուցել նախագահի ելույթները: Եվ դրանք, անշուշտ, իրենց էֆեկտը կունենան: Եվ որքան Էլ որ մենք կոչ անենք ժողովրդին՝ չանսալ խոսքին, այլ առաջնորդվել գործով, միևնույն է՝ խոսքը մոգական ուժ ունի: Այն էլ մեր տաքարյուն ժողովրդի դեպքում:

Բայց այս ամենի մեջ այնուամենայնիվ կա մի բան, որն ինձ ուրախացնում է: Դա այն է, որ և իշխանությունը, և ինքը՝ նախագահը, որքան էլ որ իբր երկաթե համոզվածություն ունեն, թե 100-ից 80 են «խփելու», բոլորովին էլ վստահ չեն. այս ելույթները միանգամայն հակառակի մասին են խոսում: Եվ անգամ ուժեղ մրցակիցների թվացյալ բացակայության պարագայում, այնպես չէ, որ ընտրությունների ելքը կանխորոշված է: Դա նաև վկայում է, որ ոչ մեկը, անգամ ամենաքարացած բռնակալը վախենում է ժողովրդից ու նրա զայրույթից և հասկանում է, որ բռնությունները, ճնշումները, վախի մթնոլորտը, խեղճությունը, ընտրակեղծիքների ամենակուռ մեխանիզմներն ու ընտրակեղծարարների ամենակուռ շարքերը, ադմինիստրատիվ հզոր լծակներն ու կաշառքի միլիոնավոր դոլարները երաշխիքներ չեն տալիս: Միակ ելքը սեփական ժողովրդի խղճին ապավինելն է:

Ինչը և անում է ՀՀԿ թեկնածուն»: