«ՀԺ». Փողը միայն վստահելիներին. ՀՀԿ-ն փող է բաժանում

Քարոզարշավի մեկնարկի առաջին իսկ օրվանից ՀՀ նախագահի թեկնածու Սերժ Սարգսյանն իր յուրաքանչյուր նախընտրական հանդիպման ժամանակ խոսում է աննախադեպ լավ ընտրություններ անցկացնելու մասին:

«Հայկական ժամանակը» գրում է. «Տարբեր ռանգի հանրապետականներ մասնավոր զրույցներում պարբերաբար վստահեցնում են, թե այս անգամ ընտրակաշաոք չի բաժանվելու: Եվ այդուամենայնիվ, արդեն մի քանի օր է, հանրապետության տարբեր մարզերից և Երևանից տեղեկություններ են ստացվում ՀՀԿ-ի կողմից ընտրակաշառք բաժանելու համար նախապատրաստական աշխատանքներ տանելու՝ տնետուն մարդկանց այցելելու, ցուցակագրելու մասին: Նախօրեին մեզ հայտնեցին, որ պրոցեսը սկսված է, և արդեն երկու օր է ընթանում է Նոր Նորքում: Այցելեցինք թաղամասի մի քանի շենքերի պատահական ընտրված բնակարաններ (Նոր Նորքի 3-րդ զանգված, 20, 22, 24 և մի քանի այլ շենքեր): Այցի ընթացքում ծանոթացանք ոչ միայն վերոնշյալ գործընթացի մանրամասներին, այլև ընտրողների ընդհանուր տրամադրությանը: ՀՀԿ-ից եկե՞լ են ձեր տուն՝ հարցին մեծ մասը պատասխանում էր՝ այո: «ԺԵԿ-ից եկան, դե, իրանք ՀՀԿ են, հարցրեցին՝ ընտրություններին մասնակցելու՞ եք, ասեցի՝ հա: Ճշտեցին՝ քանի հոգի ենք մասնակցելու»,- ասաց բնակչուհիներից մեկը: Փող չառաջարկեցի՞ն՝ հարցին պատասխանեց. «ՉԷ, իրանք չառաջարկեցին, ես առաջարկեցի, ասեցին, ոչ մի բան չի շարժվում, փող չկա»: Այս բնակարանի արտաքին զննությունից անգամ երևում էր, որ առնվազն անապահով խավից չեն:

Մեկ այլ բնակիչ պատմեց. «Եկել են, հարցրել են՝ մասնակցելու՞ ենք, թե չէ: Մասնակցելու եմ, բայց հլը չեմ կողմնորշվել: Ուզում եմ, որ երկիրը մի քիչ կարգավորվի, ուզում եմ, իմ ուզած մարդը ընտրվի, գնալու եմ, տեսնեմ՝ ով է հարմար, բայց կեսին գիտեմ, կեսին ծանոթ չեմ: Չեմ ասի՝ ում եմ ընտրելու, բայց 100 տոկոս իշխանության թեկնածուին չեմ ընտրելու»,- ասում էր տարեց մարդը:

Բնակարաններից մեկի դուռը բացած երիտասարդ մի աղջիկ էլ հայտնեց, թե տեղյակ չէ՝ իրենց տուն այցելել են, թե՝ ոչ, բայց ինքը գնալու է ընտրության: «Ամբողջ ընտանիքով գնալու ենք, բայց ես ոչ մեկին չեմ ընտրելու: Երևի թերթիկը փչացնեմ: Գնալու եմ, որ իմ անունից ոչ մեկ չկարողանա ընտրություն կատարել»,- ասում էր աղջիկը:

Քիչ չէին նաև անտարբերները: «Եկան, ասեցի՝ չեմ գնալու, գնամ ի՞նչ անեմ: Նշեցին իրանց մոտ, թողեցին, գնացին»,- ասաց մեկ այլ ընտրող, ում համոզված ենք, դեռ էլի կայցելեն: Մեկ ուրիշն էլ ասում էր, որ «հյուրերը» փորձել են բացատրել, որ ընտրության գնալը կարևոր է: «Մեկ ա, ստեղ ընտրություն չկա»,- ասաց բնակչուհին:

Երբ այցելեցինք մոտակայքում գտնվող Նոր Նորք 3 համատիրություն, նախագահ Մեսրոպ Գևորգյանը, ով պարզվեց, նաև Նոր Նորքի 3-րդ զանգվածի ՀՀԿ կառույցի ղեկավարն է, զրույցի ընթացքում խոստովանեց, որ իրենք այցելել են բնակիչներին, սակայն ասաց, որ միայն նրա համար, որ պարզեն՝ մասնակցելու են ընտրություններին, թե՝ ոչ: «Մոտ 60 տոկոս մասնակցություն կլինի, 5 հազար ընտրող ունենք, մոտավորապես 3 հազարը կգնան, կընտրեն, բայց մենք ոչ մեկին չենք ասում՝ ում ընտրեն, մեկ է, իմաստ չունի: Հիմա նենց է, որ կարող է քեզ ասեն՝ հա, բայց գնան, ուրիշին ընտրեն: Զոռով էլ բերես, կմտնի, բոլորին դեմ կքվեարկի: Իրանց սրտի ուզածը չեն ասում, որ հարցնում ես»,- սրտնեղել էր Գևորգյանը: Վերջինս պնդում էր, թե կուսակցությունից իրենց փող չեն տվել: Ի դեպ, համատիրության ղեկավարի սեղանին լցված էին Սերժ Սարգսյանի քարոզչանյութերը, իսկ մեր զրույցի ընթացքում մի տղամարդ ինչ-որ ցուցակ հանձնեց նրան, որը նա արագ ծալեց ու դրեց իր նոթատետրի մեջ:

Մեզ, այդուամենայնիվ, հաջողվեց ճշտել, թե ինչպես է գումարը հասնելու բնակիչներին: Այսպես, լավատեղյակ աղբյուրի փոխանցմամբ, հանձնարարված է ոչ ոքի անհատապես գումար չտալ, ՀՀԿ տարածքային կառույցներն ունեն վստահելի մարդիկ, որոնք այցելում են ոչ պակաս, քան 2 ընտրող ունեցող ընտանիքներին, վերցնում անձնագրերը, ներկայացնում տարածքի ՀՀԿ շտաբ, ասում՝ ընտանիքով Սերժ Սարգսյանին են ընտրելու, բայց գումարի կարիք ունեն: Ընդ որում, ինչպես նշեց աղբյուրը, գումարը ստացողն էլ պետք է վստահելի լինի, այսինքն, գործարքը կայանում է շատ զգույշ, որպեսզի աղմուկ չբարձրանա, ընտրակաշառքը համատարած չի բաժանվում, վստահելիների միջից էլ ընտրվում են սոցիալապես վատ վիճակում գտնվողները:

Արդեն բաժանվող ընտրակաշառքի մասին տեղեկություններ են հաղորդում Րաֆֆի Հովհաննիսյանի շտաբից: «Գեղարքունիքի մարզ, Վերին Գետաշեն գյուղի բնակիչը հայտնեց, որ իրենց գյուղապետը հավաքում է քաղաքացիների անձնագրերը և բաժանում 10.000-ական դրամ՝ Սարգսյանին ընտրելու համար»,- նման բազմաթիվ լուրերի կարելի է հանդիպել Րաֆֆի Հովհաննիսյանի կայքում»: