Սուր շնչառական վարակներ և գրիպ. Հայաստանում իրավիճակը հանգիստ է

Հայաստանի Հանրապետությունում սուր շնչառական վարակների համաճարակային իրավիճակը մնում է հանգիստ, դիտվում է սեզոնային բնականոն ընթացք: Իրականացվող մոնիտորինգի տվյալներով 2013 թվականի ընթացքում սուր շնչառական վարակների հիվանդացությունը 2012 թվականի նույն ժամանակաշրջանի համեմատ նվազել է մոտ 1,1 անգամ: Սեզոնի ընթացքում իրականացվող շաբաթական մոնիտորինգի տվյալների վերլուծությունը վկայում է այն մասին, որ 2013 թվականի 5-րդ շաբաթվա ընթացքում նախորդ տարվա նույն շաբաթվա համեմատ նվազել է գրեթե 1,7 անգամ:

2013թ. փետրվարից հանրապետությունում շրջանառվում են գրիպի Ա (H1N1, H1N1պնդ, H2N3) և Բ տեսակները: Ինչ վերաբերում է գրիպի Ա H1N1պնդ ենթատեսակին՝ նախկինում խոզի գրիպին, ապա պետք է նշել, որ Առողջապահության համաշխարհային կազմակերպության պաշտոնական հայտարարությամբ այն այլևս չունի 2009 թվականի պանդեմիկ ներուժը և դասվում է սեզոնային գրիպի ենթատեսակների շարքին: Գրիպի յուրաքանչյուր տեսակով կամ ենթատեսակով պայմանավորված հնարավոր է հիվանդության միջին և ծանր ընթացքով դեպքերի արձանագրում, որին կարող են նպաստել բժշկին ուշ դիմելը, ինքնաբուժմամբ զբաղվելը, ուղեկցող հիվանդությունների (հիվանդների առողջական վիճակ) առկայությունը, հիմնական (քրոնիկ) հիվանդությունների կլինիկական առանձնահատկությունները և այլն:

Հիշեցնենք, որ Առողջապահության համաշխարհային կազմակերպության տվյալների համաձայն եվրոպական տարածաշրջանում դիտվում է սուր շնչառական վարակների տարածվածության շարժընթաց հարավից հյուսիս։ Հարավում իրավիճակն արդեն կայունանում է, իսկ հյուսիսում աճի միտումը դեռ շարունակվում է։ 90% դեպքերում արձանագրվում են գրիպի Ա, մնացած դերքերում' Բ տեսակները:

ՀՀ առողջապահության նախարարությունը բնակչությանը հորդորում է գրիպանման երևույթների դեպքում անհապաղ դիմել բժշկական օգնության, չզբաղվել ինքնաբուժմամբ:

Ներկայումս հանրապետությունում շարունակվում են սեզոնային գրիպի դեմ կանխարգելիչ և հակահամաճարակային միջոցառումները, իրականացվում է սուր շնչառական վարակների և գրիպի օրական մոնիթորինգ:

ՀՀ առողջապահության նախարարությունը ՀԻՇԵՑՆՈՒՄ է՝

•Եթե հիվանդ եք, մնացե՛ք տանը

•Մի՛ զբաղվեք ինքնաբուժմամբ, կազմակերպե՛ք բժշկի այցը տուն

•Անհարկի, առանց բժշկի ցուցման մի՛ օգտագործեք հակաբիոտիկներ, քանի որ դրանք չեն օգնում վիրուսային ծագում ունեցող հիվանդությունների ժամանակ

•Մի՛ շփվեք գրիպանման երևույթներով հիվանդների հետ

•Խստորեն հետևե՛ք անձնական հիգիենայի պահպանման կանոններին

•Հագնվե՛ք եղանակին համահունչ

•Պահպանե՛ք հազի և փռշտալու վարվելակարգը

•Հաճախակի օդափոխե՛ք փակ տարածքները: