«ՀԺ». Վաղը չէ մյուս օրը

Երկուշաբթի՝ փետրվարի 18-ին, տեղի կունենա Հայաստանի Հանրապետության նախագահի ընտրության քվեարկությունը: Ընտրատեղամասերն ընտրողների համար բաց կլինեն ժամը 8-ից մինչև ժամը 20:00-ն, քվեարկությունը կտևի 12 ժամ:

ՀՀ նախագահի թեկնածուներն են Հրանտ Բագրատյան («Ազատություն»), Պարույր Հայրիկյան (ԱԻՄ), Րաֆֆի Հովհաննիսյան («Ժառանգություն»), Անդրիաս Ղուկասյան, Արման Մելիքյան, Սերժ Սարգսյան (ՀՀԿ) և Վարդան Սեդրակյան: Քվեարկության օրը ժամը 12:00-ին, 15:00-ին, 18:00-ին և 21:00-ին կհրապարակվեն տեղեկություններ, ըստ մարզերի և Երևան քաղաքի քվեարկությանը մասնակցած ընտրողների թվի մասին: Ընտրական տեղամասերում քվեարկության արդյունքները կամփոփվեն և դրանց վերաբերյալ կազմված արձանագրությունը կհրապարակվի ոչ ուշ, քան քվեարկությունից 10 ժամ հետո: Ընտրությունների քվեարկության նախնական արդյունքները կամփոփվեն և պաշտոնապես կհրապարակվեն մինչև փետրվարի 19-ը, ժ. 20:00-ն: Նախագահի ընտրության քվեարկության արդյունքների վերաբերյալ արձանագրությունը կկազմվի, ընտրության արդյունքները կամփոփվեն, և ընտրության արդյունքների վերաբերյալ որոշումը կընդունվի փետրվարի 25-ին: