Կայացավ Հայկ Դեմոյանի «Հայկական ազգային խորհրդանշաններ» գրքի շնորհանդեսը

Կայացավ թուրքագետ Հայկ Դեմոյանի «Հայկական ազգային խորհրդանշաններ» գրքի՝ hայկական նշանների, խորհրդանիշերի համահավաք հանրագիտարանի շնորհանդեսը:

Շնորհանդեսին ներկա էին ՀՀ մշակույթի նախարար Հասմիկ Պողոսյանը, ՀՀ գրողների միության նախագահ Լևոն Անանյանը, «Փյունիկ» հիմնադրամի համանախագահ Գարեգին Ջեմբերջյանը, ում կողմից իրականացվել է գրքի հրատարակումը, ինչպես նաև բարձրաստիճան այլ հյուրեր և գրասերներ:

Հեղինակը ներկաներին տեղեկացրեց, որ գրքի վաճառքից ստացված հասույթը կտրամադրվի սիրիահայերին, 1200 միավոր էլ կտրամադրվի Հայաստանի, Արցախի և Սփյուռքի գրադարաններին։

Հեղինակը նշեց, որ գրքում առկա է նաև Ցեղասպանության թեման, որը իրեն շատ հոգեհարազատ է. «Երբ միշտ խոսում ենք մահվան, ցավի մասին, պետք է հիշենք կյանքի շարունակությունը, այս պատկերները գալիս են քեզ ցույց տալու, որ ազգը շարունակական է»,–ասաց նա։

ՀՀ մշակույթի նախարար Հասմիկ Պողոսյանը, բարձր գնահատելով հեղինակի աշխատանքը, նշեց, որ գիրքը ոչ միայն հետաքրքիր է իր բովանդակությամբ, այլև ամփոփում է մեր ժողովրդի անցած ողջ ուղին:

«Եվ այս լայնածավալ աշխատությունը միաժամանակ հանդիսանում է մեր հայ ժողովրդի պատմության ու անցած ուղու խտացումը: Այսօր մենք կարող ենք ասել, որ հպարտորեն կրել ենք այն արժեքները, որոնք ներկայացված են այս գրքում», -նշեց նախարարը' եւս մեկ անգամ շնորհավորելով գրքի հեղինակին:

Նախարարն ասաց, որ հաշվի առնելով պատմական բոլոր հանգամանքները, իր համար շատ կարևոր է Հայաստանի Առաջին Հանրապետության մասին հատվածը։

Նշենք, որ գրքում ներկայացվում են հայկական մատենագրություն, ճարտարապետություն, պատկերաքանդակներ, լուսանկարներ և հայկական զինանշանները, դրոշները, պետական ու ազգային խորհրդանշանները: Առանձին ներկայացված են ՀՀ պետական խորհրդանշաններն ու պարգևները: