Բարաք Օբաման միգրանտների կարգավիճակի օրինականացման համար տրամադրում է 8 տարի

ԱՄՆ-ի նախագահ Բարաք Օբամայի կառավարությունը մշակել է օրենքի նախագիծ, որի համաձայն՝ անօրինական միգրանտներին կտրամադրվի 8 տարի օրինական կարգավիճակ ստանալու համար, եթե վերջիններս սովորեն անգլերեն և հետևեն մնացած պահանջներին: Այս մասին հայտնում է Lenta.ru-ն` հղում կատարեով USA Today պարբերականին: 

Բացի այդ, նոր նախագիծը հնարավորություն է տալիս միգրանտներին դիմում ներկայացնել նոր ստեղծված վիզայի համար, որը կոչվում է «Ապագա օրինական միգրանտ» և հնարավորություն կտա ձեռք բերել ապահովագրություն: Համաձայն նախագծի՝ օրինական կարգավիճակ կարող են ստանալ ոչ միայն մեկնածները, այլև նրանց կանայք և երեխաները: 

Նոր վիզա ստանալու համար միգրանտները պետք է քրեական անցյալ չունենան և տրամադրեն կենսաչափական տվյալներ: Այս վիզան հնարավորություն կտա միգրանտներին աշխատել 4 տարի, ինչից հետո նրանք կարող են կրկին դիմում ներկայացնել և երկարաձգել վիզան: 

Այս նախագծի համաձայն՝  8 տարի հետո միգրանտները կարող են դիմել Գրին քարտի համար, սակայն վերջինս ստանալու համար նրանք ստիպված են լինելու սովորել անգլերեն, ԱՄՆ-ի պատմություն և վճարել հարկերը: 

Սպիտակ տան հետ զուգահեռ օրինագիծ են մշակում նաև Կոնգրեսի 2 պալատները, սակայն այդ քննարկումները բարդանում են պատգամավորների միջև եղած տարաձայնությունների պատճառով: Եթե Կոնգրեսը չկարողանա մշակել նախագիծ, ապա Օբամայի կառավարությունը կներկայացնի իր օրինագիծը հաստատելու համար: 

Նշենք, որ ԱՄՆ-ում ապրում է շուրջ 11 մլն անօրինական միգրանտ: