Հայաստանն այսօր Նախագահ է ընտրում

Այսօր՝ փետրվարի 18-ին, Հայաստանում անցկացվում են նախագահական ընտրություններ: Ընտրությունների մեկնարկն արդեն իսկ տրված է: Առավոտյան ժամը 8:00-ից բացվել են Հանրապետությունում գործող բոլոր ընտրատեղամասերը և ընտրողները քվեարկել կարող են մինչև ժամը 20:00-ն:

Կենտրոնական ընտրական հանձնաժողովը պաշտոնապես գրանցեց 8 թեկնածու, թեև՝ առաջադրվել էին 15-ը:

Սակայն քարոզարշավի ընթացքում թեկնածուների թիվը նվազեց մեկով: Մեկ օր հացադուլ հայտարարելուց հետո նախագահի թեկնածու, «Ազգային համաձայնություն» կուսակցության նախագահ Արամ Հարությունյանն ինքնաբացարկ հայտնեց: Նշենք, որ վերջինիս ԿԸՀ-ն չէր գրանցել որպես նախագահի թեկնածու, քանի որ նա չէր վճարել 8 մլն ընտրագրավը: Սակայն ԿԸՀ-ի կողմից տրամադրված 48 ժամ հավելյալ ժամանակը հնարավորություն տվեց Արամ Հարությունյանին վճարել անհրաժեշտ ընտրագրավը: 

Եվ այսպես, այսօր ՀՀ քաղաքացիներն իրենց ձայնը տալու են այս թեկնածուներից մեկին. ՀՀ գործող նախագահ Սերժ Սարգսյան, «Ժառանգություն» կուսակցության առաջնորդ Րաֆֆի Հովհաննիսյան, «Ազատություն» կուսակցության ղեկավար Հրանտ Բագրատյան, «Ազգային ինքնորոշում» միավորման ղեկավար Պարույր Հայրիկյան, Լեռնային Ղարաբաղի նախկին արտգործնախարար Արման Մելիքյան, «Ռադիո հայ» ՍՊԸ-ի տնօրեն Անդրիաս Ղուկասյան և անկուսակցական Վարդան Սեդրակյան: