«Գեներալի աղջկա» «ամուսինը» իրականում որդի ունի

«Գեներալի աղջիկը» սերիալից հեռուստադիտողին հայտնի Արմանը՝ Արամ Մանուկյանը, զրուցել է ArmStar.am–ի հետ, պատմել է իր մասնագիտության, ֆիլմում հայտնվելու, կնոջ և որդու մասին:

Արամ, չնայած ֆիլմում Ձեր շատ համոզիչ կերպարին, պարզվում է՝ մասնագիտությամբ պարող եք. ինչպե՞ս հայտնվեցիք «Գեներալի աղջիկը» սերիալում:

-Սերիալում նկարահանվելու առաջարկը ստացել եմ ֆիլմի ռեժիսոր Ելենա Արշակյանից: Այն չմերժեցի, չնայած հենց առաջարկը ստանալու օրը մեկնում էի Մոսկվա, որտեղ իմ պարային համույթը՝ «Inter Dance»-ը, պետք է մասնակցեր ''Երևանի օրը Մոսկվայում'' միջոցառմանը: Ստացվում էր այնպես, որ իմ բացակայությունը խոչընդոտում էր նկարահանման աշխատանքներին: Ուստի արդեն պարզ էր՝ չեմ կարողանա աշխատել ֆիլմում: Սակայն Մոսկվայում տեղեկացա, որ վերադառնալուս օրը ես նկարահանման եմ: Օդանավակայանում արդեն զբաղված էի սցենար սովորելով:

Այլ սերիալներում նկարահանվե՞լ եք, և եղե՞լ են առաջարկներ, որոնք մերժել եք:

- Շատ առաջարկներ եմ մերժել, որովհետև ինձ համար մեծ նշանակություն ունի թե ով է հրավիրողը, և ինչ որակ ունի տվյալ աշխատանքը: Բավականին երկար ժամանակ նկարահանվել եմ «Կյանքի Գինը» հեռուստասերիալում: Փորձում էի համատեղել պարն ու կինոն, սակայն եկավ մի ժամանակ, երբ ես ստիպված էի կանգնել ընտրության առաջ: Երկու աշխատանքներն էլ շատ ժամանակատար էին, և ես ընտրեցի պարն ու շարունակեցի պարել ''Բարեկամություն'' համույթում:

Այսօր կրկին նկարահանվում եք սերիալում, հիմա կարողանու՞մ եք համատեղել, արդյո՞ք չի տուժում բուն մասնագիտությունը:

Իմ բուն մասնագիտությամբ զբաղվում եմ. ես իմ շատ լավ ընկերների՝ Ասատուր Քալաշյանի և Կարեն Խաչատրյանի հետ հիմնեցի ''Inter Dance'' պարային համույթը,- ArmStar.am-ի հետ կիսվեց Արամը: Ճիշտ եք, նկարահանումները շատ ժամանակ են խլում ինձնից, և լինում են դեպքեր, որ չեմ կարողանում ներկա գտնվել համույթի փորձերին, սակայն վստահ եմ, որ դրանից ինչ-որ բան չի փոխվում, որովհետև ընկերներս միշտ այնտեղ են: Նշեմ նաև, որ շատ հազվադեպ եմ հիմա պարում, քանի որ իմ աշխատանքը համույթը տնօրինելն է, չնայած, հուսով եմ, որ կգա մի ժամանակ, երբ նորից կպարեմ բեմում և պարային ծրագրով կներկայանամ արվեստասեր հասարակությանը:

Խոսենք հենց Ձեզնից: Որտե՞ղ եք սովորել և ինչո՞վ եք զբաղվում այժմ: /բացի դերասանությունից/

-Սովորել եմ Երևանի Թատրոնի և Կինոյի Պետական ինստիտուտի «Պարարվեստի ռեժիսուրա» բաժնում: 11 տարի պարել եմ ''Բարեկամություն'' պետական համույթում: Իմ վերջին մենահամերգը անսամբլի հետ եղել է որդուս ծնվելու օրը: ''Բարեկամություն''-ից դուրս գալով՝ չեմ դադարել պարով զբաղվել. այդ ժամանակ արդեն հիմնել էի ''Inter Dance''-ը:
Այժմ զբաղվում եմ համույթի գործերով, կազմակերպում միջոցառումներ:

Համակրելի հայտնի երիտասարդները միշտ էլ ուշադրության են արժանանում հակառակ սեռի կողմից: Ինչպե՞ս է դրան վերաբերվում Ձեր կինը: Եվ արդյո՞ք այդ ուշադրությունը չի ազդում Ձեր ընտանեկան մթնոլորտի վրա:

- Դե, բնականաբար, նման դեպքեր լինում են: Ես էլ աշխատում եմ սիրալիր լինել բոլորի հետ: Կինս խելացի է և շատ ըմբռնումով է մոտենում այս հարցին: Եվ դա ոչ մի կերպ չի կարող ազդել մեր ընտանեկան մթնոլորտի վրա, քանի որ մեր ընտանիքը հիմնված է սիրո և փոխադարձ հարգանքի վրա, ինչի համար շատ շնորհակալ եմ կնոջս և որդուս,- ArmStar.am-ի հետ զրույցում անկեղծացավ դերասանը:

Ունեք նաև որդի… քանի՞ տարեկան է: Ի՞նչ ընդհանուր հետաքրքրություններ ունեք միասին:

-Որդիս՝ Անրին, 2 տարեկան 4 ամսեկան է: Շատ խելացի և զարգացած է իր տարիքի համար: Արդեն զգացվում է նրա սերը դեպի երաժշտությունն ու պարը: Կարծում եմ, որ հենց արվեստն է մեր ընդհանուր հետաքրքրությունը:

Հասարակության մի մասը սովորաբար նույնացնում է և չի տարբերում սերիալային կերպարն իրականից: Ի՞նչ տարօրինակ կամ զվարճալի դեպքեր են եղել Ձեզ հետ:

- Հեռուստադիտողները շատ ծանր են տանում Նարեի ու Արմանի բաժանվելը և իրենց դաստիարակչական խոսքերով փորձում են խորհուրդներ տալ ինձ, թե ինչպես արժանանամ Նարեի ներմանը, նորից միանամ ու ամուր ընտանիք կազմեմ:

Որքան էլ փորձում եմ բացատրել մարդկանց , որ նրանք ընդամենը սերիալային կերպարներ են, միևնույն է, մարդիկ շարունակում են անհանգստանալ նրանց հարաբերությունների համար: Նաև զվարճալի է, երբ մարդիկ մոտենում են' ասելով, թե կարող ես ինչ-ինչ հարցերով դիմել գեներալ աներոջդ:

Իսկ զրույցի վերջում, մեր այսօրվա հերոսն ArmStar.am-ի միջոցով իր խոսքն ուղղեց հանրությանը:

-Ես բնականաբար հասկանում և ըմբռնումով եմ մոտենում այս երևույթին: Ինձ վրա դա ինչ-որ կերպ չի անդրադառնում, քանի որ ես Արամ Մանուկյանն եմ, այլ ոչ Արման Վարդանյանը: