Հայ աղջիկներն ու կանայք այսօր շատ ավելի լավ են դիմահարդարվում

Արդեն հինգ տարի գոյություն ունեցող Make-up Studio-ի հիմնադիր տնօրեն Հրանուշ Եղոյանը, 14 տարի է, զբաղվում է պրոֆեսիոնալ դիմահարդարմամբ: Նա Հայաստանում իրականացնում է համաշխարհային OMS ասոցիացիայի կողմից հաստատված դիմահարդարման ուսուցման իր ծրագիրը և փորձում է գիտելիքները փոխանցել մյուսներին:

Հայկական շոու-բիզնեսի ներկայացուցիչների մեծ մասը տարբեր երեկույթներին, համերգներին, տեսահոլովակների նկարահանումներին հանդես են գալիս հենց Հրանուշի ստուդիայի մասնագետների կողմից արված դիմահարդարմամբ:

Նշենք նաև, որ վերջերս Kivera Naynomis բրենդի վալենտինյան նոր ֆոտոնախագծում ներկայացված բոլոր արտիստների դիմահարդարումը կրկին Make-up Studio-ինն էր:

- Հրանուշ, make-up-ը ևս հետևո՞ւմ է նորաձևության տենդենցներին։

- Այո, իհարկե։ Ինչպես նորաձևության, այնպես էլ make-up-ի տենդենցները տարին չորս անգամ փոփոխության են ենթարկվում։ Իհարկե, կան տենդենցներ, որոնք տարիներով պահպանվում են և համարվում են կլասիկա։ Դիմահարդարման հայտնի բրենդերը տարվա ընթացքում ներկայացնում են իրենց հավաքածուները, այսպես ասած, առաջարկում են իրենց Look-ը, որին շատ մարդիկ հավանություն են տալիս և հետևում։

- Դուք make-up անելիս ի՞նչն եք կարևորում' նորաձևության տենդենցնե՞րը, թե՞ տվյալ մարդու դիմագծերին համապատասխան դիմահարդարում անելը։

- Եթե անձը նոր է սկսում մեզ մոտ հաճախել, մենք ձգտում են պահպանել նրա բնական տվյալները և գրագետ ձևով ընդգծել դրանք։ Ունենք նաև այնպիսի հաճախորդներ, ովքեր մշտապես մեզ մոտ են գալիս, և նրանց մենք կարողանում ենք առաջարկել նորաձև մեյք-ափեր։ Նորեկ հաճախորդներին նորաձևության տենդենցները, հնարավոր է՝ վանեն, քանի որ, ի վերջո, դիմահարդարումը մի փոքր ինտիմ գործընթաց է։

- Ձեզ դիմո՞ւմ են Faceart անելու համար։

- Faceart-ի տարրեր գործածվում են հատուկ միջոցառումների, նկարահանումների դեպքում, երբ արտիստին պետք է ներկայացնել այս կամ այն կերպարում։ Օգտագործվում են նաև տարբեր մրցույթների ժամանակ, բայց առօրյայում նման դեպքեր չեն լինում։

- Եթե անդրադառնանք հայ աղջիկների և կանանց առօրյա դիմահարդարմանը, ի՞նչ կնկատենք։ Ինչպիսի՞ կոպիտ սխալներ են թույլ տրվում։

- Ես միշտ փորձում եմ քննադատությունից զերծ մնալ և ավելի շատ լավն եմ տեսնում, քան վատը։ 14 տարի է՝ զբաղվում եմ պրոֆեսիոնալ դիմահարդարմամբ և նկատում եմ, որ մեծ արագությամբ տեղի են ունենում դրական փոփոխությունները։ Հայ աղջիկներն ու կանայք այսօր շատ ավելի լավ են դիմահարդարվում, քան տարիներ առաջ։ Եթե անդրադառնանք սխալներին, ես միշտ ասում եմ' առօրյայում ձգտեք չդիմահարդարվել, քան դիմահարդարվել։ Մաշկի խնամելուն շատ ավելի մեծ տեղ եմ հատկացնում, քանի դեկորատիվ միջոցներին։ 20-25 տարեկան երիտասարդները պետք է ընդգծեն իրենց դեմքի առավելագույնը երկու էլեմենտը, օրինակ' թարթիչներն ու շրթունքը։ Երբ դեմքի ամեն էլեմենտն ընդգծվում է, գեղեցիկ չի լինում, և երեկոյան դիմահարդարմանն այլևս տեղ չի մնում։

- Նկատելի է, որ հայ աղջիկները միանման են դիմահարդարվում։ Ի՞նչ եք կարծում' ինչի՞ց է դա գալիս։

- Սա խոսում է անհատականության կորստի մասին։ Տեսեք' այսօր բոլորն ուզում են բաց գույնի շրթներկ օգտագործել, բայց դա բոլորին չի սազում։ Ինչքան էլ նորաձևությունը դա պահանջի, պետք է անպայման հաշվի առնես' դա քեզ գեղեցկացնո՞ւմ է, թե՞ ոչ։ Նորաձև և գեղեցիկ լինելն իրարից բարակ գծով անջատվում են։ Միշտ չէ, որ նորաձև լինելը գեղեցիկ է։ Նորաձևությունն այնքան արագ է փոփոխության ենթարկվում, որ, եթե նույնիսկ «սուր» նորաձև լինես, կարող է երկու օր հետո ինքդ քեզ ծիծաղելի թվաս: «Սուր» նորաձևությունից ես միշտ խուսափել եմ։

- Դուք աշխատում եք նաև շոու-բիզնեսի ներկայացուցիչների հետ, դիմահարդարման առումով այստեղ իրավիճակն ինչպիսի՞ն է։

- Այո, կարող եմ ասել, որ շոու-բիզնեսի ներկայացուցիչների 90%-ի հետ աշխատում ենք (Նազենի Հովհաննիսյան, Քրիստինե Պեպելյան, Սոֆի Մխեյան, Էմմի, Իվետա Մուկուչյան, Լուսինե Թովմասյան, Լիլիթ Հովհաննիսյան, Արմինկա, Շուշան Պետրոսյան, Զարուհի Բաբայան, Հռիփսիմե Հակոբյան, Մայա և Սոֆյա Պողոսյաններ, Լուիզա Ներսիսյան…)։ Կրկին կարող եմ ասել, որ իրավիճակն այստեղ ևս բավականին լավ է, իսկ դա գալիս է նրանից, որ սկսել են մասնագետներին վստահել և չառարկել։ Եթե առաջ տեսահոլովակի նկարահանման ժամանակ ասում էին, թե այսպիսի-այնպիսի դիմահարդարում են ուզում, ապա այսօր դա բացակայում է։ Երբ արդեն իմանում ես տեսահոլովակի իմաստը, տեղանքը, որտեղ այն նկարահանվելու է, սյուժեն, հագուստը, սանրվածքը, քեզ համար էլ է պարզ դառնում, թե ինչպիսի դիմահարդարում է անհրաժեշտ։

- Ինչպե՞ս եք վերաբերվում նրան, որ այսօր շատ հայ արտիստներ կրկնօրինակում են համաշխարհային մեծության աստղերի դիմահարդարումը։

- Շատ բարդ դիմահարդարում արտատպելը խոսում է պրոֆեսիոնալիզմի մասին։ Երբեմն մարդիկ զուգահեռներ են տանում և ասում, թե այս երգչուհին նման է սրան, նա' նրան, և այլն։ Կարծում եմ' եթե դիմահարդարումը գրագետ է արված, որևէ խնդիր չկա, իսկ վատ կրկնօրինակի դեպքում ես ինքս էլ դեմ եմ արտահայտվում։

- Այսօր Հայաստանում լավ դիմահարդարողներ կա՞ն։

- Նախ՝ պետք է ասեմ, որ ես ինքնուսույցներին չեմ սիրում։ Ես պատասխանատու եմ նրանց համար, ում ինքս եմ սովորեցրել։ Կարծում եմ' պրոֆեսիոնալները քիչ են։ Թող գլուխ գովալ չհնչի, բայց ես այստեղ հավաքել եմ պրոֆեսիոնալ և լավ մարդկանց, ովքեր երբեք չեն դադարի իրենց վրա աշխատել։ Ես մինչև այսօր սովորում եմ։

- Իսկ ի՞նչ խորհուրդ կտաք երիտասարդ աղջիկներին։

- Խորհուրդ կտամ, որ աղջիկներն իրենց համար պատասխանատու օրերին դիմեն իսկական պրոֆեսիոնալներին, որ մի փոքր ափսոսանքով վերաբերվեն իրենց, խնամեն և սիրեն։

168.am