Բուլղարիայի ֆինանսների նախարարը հրաժարական է տվել զանգվածային բողոքի ցույցերի ֆոնին

Բուլղարիայի փոխվարչապետ, ֆինանսների նախարար Սիմեոն Դյանկովը հրաժարական է տվել էլեկտրաէներգիայի գների աճի դեմ բնակիչների զանգվածային ցույցերի ֆոնին. այս մասին այսօր հայտնում են ԶԼՄ-ները: Նախօրեին Բուլղարիայի մի շարք խոշոր քաղաքներում անց են կացվել բողոքի զանգվածային ցույցեր: Մարդիկ դուրս էին եկել փողոց CEZ, EVN և Energo-Pro ընկերությունների կողմից մատակարարվող էլեկտրականության՝ իրենց կարծիքով բարձր գների պատճառով: Տեղի բնակիչների կարծիքով՝ հունվար ամսվա ընթացքում իրենց ծախսած էլեկտրաէներգիայի գինը ավելացել է մոտ 2 անգամ:

Ւստ բուլղարական Novinite գործակալության տվյալների՝ Բուլղարիայի վարչապետ Բոյկո Բորիսովը մտադիր է երկրի խորհրդարանին առաջարկել մի շարք վերադասավորումներ: Մասնավորապես՝ Դյանկովի հրաժարականից հետո նա մտադիր է երկրի փոխվարչապետի պաշտոնն առաջարկել տարածաշրջանային զարգացման նախարար Լիլյան Պավլովային, ով միաժամանակ կշարունակի զբաղեցնել իր ներկայիս պաշտոնը: Իսկ Բուլղարիայի ֆինանսների նախարարի պաշտոնը, գործակալության տվյալներով, կզբաղեցնի Տոմիսլավ Դոնչևը, ընդ որում, նա ևս կշարունակի զբաղեցնել իր ներկայիս՝ ԵՄ միջոցների կառավարման նախարարի պաշտոնը: