ՄԱԿ. Սիրիական հակամարտության երկու կողմերն էլ ռազմական հանցագործություններ են գործել

Սիրիայում նախագահ Բաշար ալ Ասադի կողմնակիցների և ընդդիմադիրների միջև արդեն երկրորդ տարին ձգվող քաղաքացիական պատերազմի ընթացքում հակամարտության երկու կողմերն էլ ռազմական հանցագործություններ են գործել: Նման հետևության են եկել ՄԱԿ-ի հատուկ հանձնաժողովի աշխատակիցները, ովքեր հրապարակել են մերձարևելյան երկրում ձգձգվող ռազմական գործողություններին նվիրված զեկույց. հայտնում է Reuters-ը:

131 էջից բաղկացած զեկույցը ներառում է 445 հարցազրույց իրադարձությունների անմիջական մասնակիցների` տուժածների և վկա փախստականների հետ: Նրանց խոսքերով` և՛ կառավարական զորքերը, և՛ ընդդիմադիրները սպանել և խոշտանգումների են ենթարկել խաղաղ բնակիչներին: Զեկույցի հեղինակները խորհուրդ էին տալիս ՄԱԿ-ի Անվտանգության խորհրդին քաղաքացիական բնակչության դեմ հանցանք գործածներին Միջազգային քրեական դատարանի առջև կանգնեցնել:

Հիշեցնենք, որ Սիրիայում մարդկանց իրավունքների իրավիճակի մոնիթորինգի ընթացքը բարդացվել էր այն հանգամանքով, որ իշխանությունները փակել էին ՄԱԿ-ի աշխատակիցների մուտքը երկրի տարածք: Քաղաքացիական պատերազմը Սիրայում շարունակվում է 2011-ի մարտից: Ըստ ՄԱԿ-ի տվյալների` հակամարտությունը խլել է մոտ 70.000 մարդու կյանք, և օրեկան ավելի քան 5 000 մարդ լքում է երկիրը: