Ժողովրդավարությունը Հայաստանում մահացել է դեռ չծնված. ակցիա (տեսանյութ)

Այսօր՝ փետրվարի 19-ին, ԿԸՀ-ի դիմաց տեղի ունեցավ «Չծնված ժողովրդավարության վախճանը» խորհրդանշող ակցիա, որի ժամանակ ծաղկեպսակ դրվեց ԿԸՀ-ի մուտքի մոտ:

Ակցիայի նպատակի մասին խոսելիս ակտիվիստ Կարեն Հարությունյանն ասաց. «Ժողովրդավարությունը Հայաստանում դեռ չծնված մահացել է, և դրան նպաստել են այս կառույցում գտնվող հանցագործները, ովքեր պետական հանցագործություն են անում, բոլորիս իրավունքներ են խախտում, չեն թողնում հաստատել ժողովրդի իշխանությունն այս երկրում։ Նրանք նպաստում են հանցավոր ռեժիմի վերարտադրմանը»։

Ակցիայի ընթացքում ոստիկանները թույլ չէին տալիս մասնակիցներին ծաղկեպսակ դնել ԿԸՀ-ի մուտքի մոտ, պնդելով, որ այդ կերպ կխանգարվի աշխատակիցների ելքումուտը։

Lurer.com-ի թղթակցի հարցին ի պատասխան՝ Կարեն Հարությունյանը նշեց, որ այս ակցիաները շարունակական բնույթ են ունենալու։ Ինչ վերաբերում է ԳԱԱ-ի դիմաց երեկվանից իրականացվող նստացույցին, վերջինս նշեց, որ դեռևս չեն որոշել կշարունակվի, թե՝ ոչ։ 

Մեր թղթակիցը հարցրեց նաև, թե քաղաքացիական հասարակության կողմից կազմակերպվող այս ակցիան կապ ունի ՀՀ նախագահի թեկնածու Անդրիաս Ղուկասյանի հետ՝ հաշվի առնելով, որ ներկայացվող պահանջները նույն բովանդակությունն ունեն։ Կարեն Հարությունյանը, պատասխանելով հարցին, ասաց.

«Վե՛րջ շինծու ընտրություններին» կոչը բոլորիս հետ երևի կապ ունի, Անդրիաս Ղուկասյանի հետ էլ կապ ունի, Րաֆֆի Հովհաննիսյանի հետ էլ կապ ունի, յուրաքանչյուրիս հետ էլ կապ ունի»։