ՀՀ նախագահն ընտրություններում հաղթանակից հետո խոստացել է անվտանգություն երկրում. Reuters

Երեքշաբթի օրվա իր ելույթում Սերժ Սարգսյանը խոստացել է ապահովել երկրի կայունությունը և անվտանգությունը ընտրություններում հաղթանակ տանելուց հետո, որոնք, միջազգային դիտորդների նկարագրմամբ, ոչ մրցակցային էին: Այս մասին հայտնում է Reuters գործակալությունը:

Նախագահական 2-րդ շրջանում Սարգսյանի գլխավոր խնդիրն է կանխարգելել Լեռնային Ղարաբաղի հարցում Ադրբեջանի հետ աճող լարվածությունը, որը կարող է բերել պատերազմի Կովկասում, որտեղով անցնում է Կասպից ծովից Եվրոպա տանող գազուղիները: 

Նախնական տվյալները ցույց են տալիս, որ Սերժ Սարգսյանը հաղթանակ է տարել 58,6 % ձայնով, սակայն այս արդյունքները չեն ընդունում ընդդիմադիր գործիչները, նշելով, որ ընտրությունները կեղծված են եղել:

Սարգսյանի գլխավոր հակառակորդ՝ ԱՄՆ-ում ծնված Րաֆֆի Հովհաննիսյանն ընտրություններում ստացել էր 37 % ձայն:

Միջազգային դիտորդներն այս ընտրություններում առաջընթաց են արձանագրել՝ համեմատած նախկին ընտրությունների, ներառյալ՝ 2008 թվականի ընտրությունները, որոնց ընթացքում զոհվեց 10 մարդ:

«Այնուամենայնիվ, թեկնածուների սահմանափակ լինելը ցույց է տալիս, որ դրանք մրցակցային չեն եղել»,-նշված է ԵԱՀԿ ներկայացուցիչների հայտարարության մեջ:

Սարգսյանի գլխավոր քաղաքական հակառակորդ Լևոն Տեր-Պետրոսյանը մերժել էր մասնակցել ընտրություններին` վստահ լինելով, որ արդյունքները կեղծվելու են: 

Հովհաննիսյանի «Ժառանգություն» կուսակցությունը նշում է, որ իրենց օգտին քվեարկած շատ քվեաթերթիկներ անվավեր են ճանաչվել:

Երեքշաբթի օրը Հովհաննիսյանին կողմնակից 500 մարդ հավաքվել էր Ազատության հրապարակում` կոչ անելով Սարգսյանին վայր դնել իշխանությունը և խոստանալով հակառակ դեպքում ավելի շատ բողոքի ցույցեր, սակայն բռնություններ չեն արձանագրվել: